Aur Ibn Abbas (Radi Allahu Anhuma) ne kaha ke muhrim (ghusl ke liye) hammam mein ja sakta hai. Ibn Umar aur Aisha (Radi Allahu Anhum) badan ko khujane mein koi haraj nahi samajhte thay
.

Hum se Abdullah Bin Yusuf ne bayan kiya, kaha ke hum ko Imam Malik ne khabar di, unhein Zaid Bin Aslam ne, unhein Ibrahim Bin Abdullah Bin Hunain ne, unhein un ke walid ne ke Abdullah Bin Abbas aur Miswar Bin Makhramah (Radi Allahu Anhum) ka maqam-e-Abwa mein (ek masla par) ikhtilaf hua. Abdullah Bin Abbas (Radi Allahu Anhuma) ne mujhe Abu Ayyub (Radi Allahu Anhu) ke yahan (masla poochne ke liye) bheja, mein jab un ki khidmat mein pohancha to wo kunwein ke do lakriyon ke beech ghusl kar rahe thay, ek kapre se unhon ne parda kar rakha tha mein ne pohanch kar salam kiya to unhon ne daryaft farmaya ke kaun ho ? Mein ne arz ki ke mein Abdullah Bin Hunain hoon, Aap (Radi Allahu Anhu) ki khidmat mein mujhe Abdullah Bin Abbas (Radi Allahu Anhuma) ne bheja hai ye daryaft karne ke liye ke ihram ki halat mein Rasul Allah (Sallallahu Alaihi Wasallam) sar mubarak kis tarah dhowte thay. Ye sun kar unhon ne kapre par (jis se parda tha) hath rakh kar usay neeche kiya. Ab aap ka sar dikhayi de raha tha, jo shakhs un ke badan par pani daal raha tha, us se unhon ne pani dalne ke liye kaha. Us ne un ke sar par pani dala, phir unhon ne apne sar ko donon hath se hilaya aur donon hath aage le gaye aur phir peeche laye farmaya ke mein ne Rasul Allah (Sallallahu Alaihi Wasallam) ko (ihram ki halat mein) isi tarah karte dekha tha
.