Hum se Amr Bin Khalid ne bayan kiya, kaha ke hum se Zuhair ne bayan kiya, kaha ke hum se Abu Ishaq Amr Bin Abdullah ne bayan kiya, kaha ke mein ne Abdul Rahman Bin Yazid se suna ke Abdullah Bin Masood (Radi Allahu Anhu) ne Haj kiya, aap ke sath taqreeban Isha ki azan ke waqt hum Muzdalifah mein bhi aaye, aap ne ek shakhs ko hukum diya is ne azan aur takbeer kahi aur aap ne Maghrib ki namaz parhi, phir do rakat (sunnat) aur parhi aur shaam ka khana mangwa kar khaya. Mera khayal hai (rawi-e-hadees Zuhair ka) ke phir aap ne hukum diya aur is shakhs ne azan di aur takbeer kahi Amr (rawi-e-hadees) ne kaha mein yahi samajhta hoon ke shak Zuhair (Amr ke sheikh) ko tha, is ke baad Isha ki namaz do rakat parhi. Jab subah sadiq hui to aap ne farmaya ke Nabi Kareem (Sallallahu Alaihi Wasallam) is namaz (Fajr) ko is maqam aur is din ke siwa aur kabhi is waqt (tulu-e-fajr hote hi) nahi parhte thay, Abdullah Bin Masood (Radi Allahu Anhu) ne ye bhi farmaya ke ye sirf do namazein (aaj ke din) apne mamooli waqt se hata di jati hain. Jab log Muzdalifah aate hain to Maghrib ki namaz (Isha ke sath mila kar) parhi jati hai aur Fajr ki namaz tulu-e-fajr ke sath hi. Unhon ne farmaya ke mein ne Rasul Allah (Sallallahu Alaihi Wasallam) ko isi tarah karte dekha tha
.