Aur Umar bin Abdul Aziz rahmatullah alaihi ne shehad mein zakat ko zaroori nahi jaana .

Hum se Saeed bin Abi Maryam ne byaan kiya ‘ kaha ke hum se Abdullah bin Wahab ne byaan kiya ‘ kaha ke mujhe Yunus bin Yazid ne khabar di ‘ unhein Shihab ne ‘ unhein Salim bin Abdullah bin Umar ne ‘ unhein un ke walid ne ke Nabi Karim salla Allahu alaihi wasallam ne farmaya . Woh zameen jisay aasman (baarish ka paani) ya chashma seerab karta ho . Ya woh khud-ba-khud nami se seerab ho jati ho to is ki paidawar se daswaan hissa liya jaye aur woh zameen jisay kunwein se paani kheench kar seerab kiya jata ho to is ki paidawar se beeswaan hissa liya jaye . Abu Abdullah (Imam Bukhari rahmatullah alaihi) ne kaha ke yeh hadees yani Abdullah bin Umar razi Allahu anhuma ki hadees ke jis kheti mein aasman ka paani diya jaye ‘ daswaan hissa hai pehli hadees yani Abu Saeed ki hadees ki tafseer hai . Is mein zakat ki koi miqdar mazkoor nahi hai aur is mein mazkoor hai . Aur zyada-ti qabool ki jati hai . Aur gol mol hadees ka hukm saaf saaf hadees ke muwafiq liya jata hai . Jab is ka rawi siqah ho . Jaise Fadhal bin Abbas razi Allahu anhu ne riwayat kiya ke Nabi Karim salla Allahu alaihi wasallam ne Kaaba mein namaaz nahi parhi . Lekin Bilal razi Allahu anhu ne batlaya ke Aap salla Allahu alaihi wasallam ne namaaz (Kaaba mein) parhi thi . Is mauqe par bhi Bilal razi Allahu anhu ki baat qabool ki gayi aur Fadhal razi Allahu anhu ka qaul chhor diya gaya .