Is ko Abdullah bin Umar razi Allahu anhuma ne Nabi Karim salla Allahu alaihi wasallam se riwayat kiya hai .

Hum se Yahya bin Bukayr ne byaan kiya , kaha ke hum se Layth bin Saad ne byaan kiya , un se Aqeel ne , un se Ibn Shihab ne , un se Ubaydullah bin Abdullah ne , un se Ibn Abbas ne aur un se Umar bin Khattab razi Allahu anhu ne farmaya ke jab Abdullah bin Ubayy ibn Salul mara to Rasool Allah salla Allahu alaihi wasallam se is par namaaz-e-janaza ke liye kaha gaya . Nabi Karim salla Allahu alaihi wasallam jab is irade se kharay huay to main ne Aap salla Allahu alaihi wasallam ki taraf barh kar arz kiya ya Rasool Allah! Aap Ibn Ubayy ki namaaz-e-janaza parhate hain halanke us ne falan din falan baat kahi thi aur falan din falan baat . Main is ki kufr ki baatein ginne laga . Lekin Rasool Allah salla Allahu alaihi wasallam yeh sun kar muskura diye aur farmaya Umar! is waqt peeche hat jao . Lekin jab main baar baar apni baat dohrata raha to Aap salla Allahu alaihi wasallam ne mujhe farmaya ke mujhe Allah ki taraf se ikhtiyar de diya gaya hai ‘ main ne namaaz parhani pasand ki agar mujhe maloom ho jaye ke sattar martaba se zyada martaba is ke liye maghfirat maangne par ise maghfirat mil jaye gi to is ke liye itni hi zyada maghfirat mangoon ga . Umar razi Allahu anhu ne byaan kiya ke Nabi Karim salla Allahu alaihi wasallam ne is ki namaaz-e-janaza parhayi aur wapas hone ke thori der baad Aap salla Allahu alaihi wasallam par Surah Bara'at ki do aayatein nazil huin . ”Kisi bhi munafiq ki maut par is ki namaaz-e-janaza Aap hargiz na parhaiye .“ aayat «wa hum fasiqoon» tak aur is ki qabr par bhi mat kharay hon ‘ in logon ne Allah aur us ke Rasool ki baatoon ko nahin maana aur mare bhi to nafarman reh kar . Umar razi Allahu anhu ne byaan kiya ke mujhe Rasool Allah salla Allahu alaihi wasallam ke huzoor apni isi din ki dalayri par taajub hota hai . Halanke Allah aur us ke Rasool (har maslahat ko) zyada jaante hain .