Hum se Muhammad bin Abd-ur-Rahim ne bayan kiya , kaha hum se Dawood bin Rasheed ne bayan kiya , kaha hum se Waleed bin Muslim ne bayan kiya , in se Abu Ghassan Muhammad bin Mutarrif ne , in se Zayd bin Aslam ne , in se Zain-ul-Aabideen Ali bin Husain ne , in se Saeed bin Marjanah ne aur in se Abu Hurairah razi Allahu anhu ne ke Nabi Karim salla Allahu alaihi wasallam ne farmaya ”jis ne kisi Musalman ghulam ko aazad kiya to Allah Ta'ala is ke ek ek tukre ke badle aazad karne wale ka ek ek tukra jahannum se aazad kare ga . Yahan tak ke ghulam ki sharmgah ke badle aazad karne wale ki sharmgah bhi dozakh se aazad ho jaye gi .“

Aur Taoos ne kaha ke mudabbar aur Umm-ul-Walad ka aazad karna kafi ho ga .

Hum se Abu al-Nu-man ne bayan kiya , kaha hum ko Hammad bin Zayd ne khabar di , unhein Amr bin Dinar ne aur in se Jabir razi Allahu anhu ne ke qabila Ansar ke ek sahab ne apne ghulam ko mudabbar bana liya aur in ke paas is ghulam ke siwa aur koi maal nahi tha . Jab is ki ittila Nabi Karim salla Allahu alaihi wasallam ko mili to Aap ne daryaft farmaya ke mujh se is ghulam ko kaun khareedta hai . Nuaym bin Nah-ham razi Allahu anhu ne aath sau dirham mein Nabi Karim salla Allahu alaihi wasallam se usay khareed liya . Main ne Jabir razi Allahu anhu ko yeh kehte suna ke woh ek Qibti ghulam tha aur pehle saal mar gaya . Nabi Karim salla Allahu alaihi wasallam ne usay neelam farma kar is raqam se usay mukammal aazad kara diya .

Hum se Sulayman bin Harb ne bayan ke , kaha hum se Shubah ne bayan kiya , in se Hakam bin Utbah ne , in se Ibrahim Nakhai ne , in se Aswad bin Yazid ne aur in se Aisha razi Allahu anha ne ke unhon ne Bareera razi Allahu anha ko (aazad karne ke liye) khareedna chaha , to in ke pehle maalkon ne apne liye walaa ki shart lagayi . Main ne is ka zikr Nabi Karim salla Allahu alaihi wasallam se kiya to Aap salla Allahu alaihi wasallam ne farmaya ke khareed lo , walaa to usi se hoti hai jo aazad karta hai .

Hum se Qutaybah bin Saeed ne bayan kiya , kaha hum se Hammad bin Zayd ne bayan kiya , in se Ghailan bin Jareer ne , in se Abu Burdah bin Abi Musa ne aur in se Abu Musa Ash'ari razi Allahu anhu ne bayan kiya ke main Rasool Allah salla Allahu alaihi wasallam ki khidmat mein qabila Ashar ke chand logon ke saath hazir hua aur Aap se sawari ke liye janwar maange . Nabi Karim salla Allahu alaihi wasallam ne farmaya ke Allah ki qasam main tumhein sawari ke janwar nahi de sakta . Phir jab tak Allah Ta'ala ne chaha hum thehre rahe aur jab kuch oont aaye to teen oont hamain diye jaane ka hukm farmaya . Jab hum unhein le kar chale to hum mein se baaz ne apne saathiyon se kaha ke hamain Allah is mein barkat nahi de ga . Hum Nabi Karim salla Allahu alaihi wasallam ke paas sawari ke janwar maangne aaye thay to Aap ne qasam kha li thi ke hamain sawari ke janwar nahi de sakte aur Aap ne inayat farmaye hain . Abu Musa razi Allahu anhu ne bayan kiya ke phir hum Nabi Karim salla Allahu alaihi wasallam ki khidmat mein hazir huay aur Aap se is ka zikr kiya to Aap salla Allahu alaihi wasallam ne farmaya ke main ne tumhare liye janwar ka intizham nahi kiya hai balkay Allah Ta'ala ne kiya hai , Allah ki qasam! Agar Allah ne chaha to jab bhi main koi qasam kha loon ga aur phir is ke siwa aur cheez mein achhayi ho gi to main apni qasam ka kaf-fara de doon ga aur wahi kaam karoon ga jis mein achhayi ho gi .

Hum se Abu al-Nu-man ne bayan kiya , kaha hum se Hammad bin Zayd ne bayan kiya , unhon ne (is riwayat mein yeh tarteeb isi tarah) bayan ki ke main qasam ka kaf-fara ada kar doon ga aur woh kaam karoon ga jis mein achhayi ho gi ya (is tarah Nabi Karim salla Allahu alaihi wasallam ne farmaya ke) main kaam woh karoon ga jis mein achhayi ho gi aur kaf-fara ada kar doon ga .

Hum se Ali bin Abdullah Madini ne bayan kiya , kaha hum se Sufyan bin Uyaynah ne bayan kiya , in se Hisham bin Hujayr ne , in se Taoos ne , unhon ne Abu Hurairah razi Allahu anhu se suna , unhon ne bayan kiya ke Sulayman alaihissalam ne kaha tha ke aaj raat main apni nawway biwiyon ke paas jaoon ga aur har biwi ek bacha jane gi jo Allah ke raaste mein jihad karein ge . In ke saathi Sufyan yani farishte ne in se kaha . Aji In sha Allah to kaho lekin Aap bhool gaye aur phir tamam biwiyon ke paas gaye lekin ek biwi ke siwa jis ke yahan na-tamam bacha hua tha kisi biwi ke yahan bhi bacha nahi hua . Abu Hurairah razi Allahu anhu riwayat karte huay kehte thay ke agar unhon ne In sha Allah keh diya hota to in ki qasam bekar na jaati aur apni zaroorat ko pa laite aur ek martaba unhon ne bayan kiya ke Rasool Allah salla Allahu alaihi wasallam ne kaha ke agar unhon ne istis-na kar diya hota . Aur hamase Abu al-Zinad ne Aaraj se Abu Hurairah razi Allahu anhu ki hadees ki tarah bayan kiya .

Hum se Ali bin Hujr ne bayan kiya , kaha hum se Ismail bin Ibrahim ne bayan kiya , in se Ayub Sakhtiyani ne , in se Qasim Tameemi ne , in se Zahdam Jurmi ne bayan kiya ke hum Abu Musa Ash'ari razi Allahu anhu ke paas thay aur hamare qabila aur is qabila Jarm mein bhai-chargi aur bahami husn e muamla ki rawish thi . Rawi ne bayan kiya ke phir khana laya gaya aur khane mein murghi ka gosht bhi thu . Rawi ne bayan kiya ke hazireen mein Bani Taymullah ka ek shakhs surkh rang ka bhi thu jaise mola ho . Bayan kiya ke woh shakhs khane par nahi aaya to Musa razi Allahu anhu ne is se kaha ke shareek ho jao , main ne Rasool Allah salla Allahu alaihi wasallam ko is ka gosht khate dekha hai . Is shakhs ne kaha ke main ne usay gandagi khate dekha thu jab se is se ghin aane lagi aur isi waqt main ne qasam kha li ke kabhi is ka gosht nahi khaoon ga . Abu Musa ne kaha: qareeb aao main tumhein is ke mutalliq bataoon ga . Hum Rasool Allah salla Allahu alaihi wasallam ke yahan Ash'ariyon ki ek jama'at ke saath aaye aur main ne Nabi Karim salla Allahu alaihi wasallam se sawari ka janwar maanga . Nabi Karim salla Allahu alaihi wasallam is waqt sadqa ke oonton mein se taqseem kar rahe thay . Ayub ne bayan kiya ke mera khayal hai ke Abu Musa razi Allahu anhu ne kaha ke Nabi Karim salla Allahu alaihi wasallam is waqt ghussa thay . Nabi Karim salla Allahu alaihi wasallam ne farmaya ke Allah ki qasam! Main tumhein sawari ke janwar nahi de sakta aur na mere paas koi aaisi cheez hai jo sawari ke liye tumhein de sakoon . Bayan kiya ke phir hum wapas aa gaye . Phir Nabi Karim salla Allahu alaihi wasallam ke paas ghaneemat ke oont aaye , to poochha gaya ke Ash'ariyon ki jama'at kahan hai . Hum hazir huay to Nabi Karim salla Allahu alaihi wasallam ne hamain paanch umdah oont diye jaane ka hukm diya . Bayan kiya ke hum wahan se rawana huay to main ne apne saathiyon se kaha ke hum pehle Nabi Karim salla Allahu alaihi wasallam ke paas sawari ke liye aaye thay to Aap ne qasam kha li thi ke sawari ka intizham nahi kar sakte . Phir hamain bula bheija aur sawari ka janwar inayat farmaye . Nabi Karim salla Allahu alaihi wasallam apni qasam bhool gaye hon ge . Wallah! Agar hum ne Nabi Karim salla Allahu alaihi wasallam ko Aap ki qasam ke baare mein ghaflat mein rakkha to hum kabhi kamyab nahi hon ge . Chalo hum sab Aap ke paas wapas chalein aur Aap ko Aap ki qasam yaad dilayein . Chunanche hum wapas aaye aur arz kiya ke ya Rasool Allah! Hum pehle aaye thay aur Aap se sawari ka janwar maanga thu to Aap ne qasam kha li thi ke Aap is ka intizham nahi kar sakte , hum ne samjha ke Aap apni qasam bhool gaye . Nabi Karim salla Allahu alaihi wasallam ne farmaya ke jao , tumhein Allah ne sawari di hai , wallah agar Allah ne chaha to main jab bhi koi qasam kha loon aur phir doosri cheez ko is ke muqabil behtar samjhoon to wahi karoon ga jo behtar ho ga aur apni qasam torr doon ga . Is riwayat ki mutabia-t Hammad bin Zayd ne Ayub se ki , in se Abu Qulabah aur Qasim bin Aasim Kulaibi ne .

Hum se Qutaybah bin Saeed ne bayan kiya , kaha hum se Abd-ul-Wahhab ne bayan kiya , in se Ayub ne , in se Abu Qulabah aur Qasim Tameemi ne aur in se Zahdam ne yahi hadees naqal ki .

Hum se Abu Mamar ne bayan kiya , kaha hum se Abd-ul-Waris ne bayan kiya , kaha hum se Ayub ne , in se Qasim ne aur in se Zahdam ne yahi hadees bayan ki .