Hum se Abdullah bin Yusuf ne bayan kiya, unhon ne kaha humein Malik ne Abdur Rahman bin Qasim se khabar di, unhon ne apne walid se, unhon ne Nabi Kareem Sallallahu Alaihi Wasallam ki Zauja Muhtarama Aisha Razi Allah Anha se, Aap ne batlaya ke hum Rasool Allah Sallallahu Alaihi Wasallam ke sath baaz safar (Ghazwa Bani al-Mustaliq) mein thay. Jab hum maqam-e-Baida ya Zaat al-Jaish par pahunche to mera ek haar kho gaya. Rasool Allah Sallallahu Alaihi Wasallam is ki talash mein wahin thehar gaye aur log bhi Aap Sallallahu Alaihi Wasallam ke sath thehar gaye. Lekin wahan pani kahin qareeb mein na tha. Log Abu Bakr Razi Allah Anhu ke paas aaye aur kaha ”Aisha Razi Allah Anha ne kya kaam kiya? Ke Rasool Allah Sallallahu Alaihi Wasallam aur tamam logon ko thehra diya hai aur pani bhi kahin qareeb mein nahi hai aur na logon hi ke sath hai.“ Phir Abu Bakr Siddique Razi Allah Anhu tashreef laye, Rasool Allah Sallallahu Alaihi Wasallam apna sar mubarak meri raan par rakhe hue so rahe thay. Farmane lage ke tum ne Rasool Allah Sallallahu Alaihi Wasallam aur tamam logon ko rok liya. Halankay qareeb mein kahin pani bhi nahi hai aur na logon ke pas hai. Aisha Razi Allah Anha kehti hain ke walid majid (Razi Allah Anhu) mujh par bahut khafa hue aur Allah ne jo chaha unhon ne mujhe kaha aur apne hath se meri kookh mein kachoke lagaye. Rasool Allah Sallallahu Alaihi Wasallam ka sar mubarak meri raan par tha. Is wajah se main harkat bhi nahi kar sakti thi. Rasool Allah Sallallahu Alaihi Wasallam jab subah ke waqt uthe to pani ka pata tak na tha. Pas Allah Ta’ala ne tayammum ki ayat utari aur logon ne tayammum kiya. Is par Usaid bin Huzair Razi Allah Anhu ne kaha ”Ae Aal-e-Abi Bakr! Yeh tumhari koi pehli barkat nahi hai.“ Aisha (Razi Allah Anha) ne farmaya. Phir hum ne is oont ko hataya jis par main sawar thi to haar usi ke neeche mil gaya. 104668

Hum se Muhammad bin Sinan Aufi ne bayan kiya, unhon ne kaha hum se Hushaim ne bayan kiya (doosri sanad) kaha aur mujh se Saeed bin Nazr ne bayan kiya, unhon ne kaha humein khabar di Hushaim ne, unhon ne kaha humein khabar di Sayyar ne, unhon ne kaha hum se Yazid al-Faqir ne bayan kiya, unhon ne kaha humein Jabir bin Abdullah ne, Nabi Kareem Sallallahu Alaihi Wasallam ne farmaya mujhe panch cheezin aisi di gayi hain jo mujh se pehle kisi ko nahi di gayi thin. Ek mahina ki masafat se raub ke zariya meri madad ki gayi hai aur tamam zameen mere liye sajda gah aur paki ke layak banayi gayi. Pas meri ummat ka jo insan namaz ke waqt ko (jahan bhi) paale use wahan hi namaz ada kar leni chahiye. Aur mere liye ghaneemat ka maal halal kiya gaya hai. Mujh se pehle yeh kisi ke liye bhi halal na tha. Aur mujhe shafa'at ata ki gayi. Aur tamam ambiya apni apni qaum ke liye mab'oos hote thay lekin main tamam insanon ke liye aam taur par Nabi bana kar bheja gaya hoon. 104669

Hum se Zakariya bin Yahya ne bayan kiya, kaha hum se Abdullah bin Numair ne, kaha hum se Hisham bin Urwah ne, woh apne walid se, woh Aisha Razi Allah Anha se ke unhon ne Asma Razi Allah Anha se haar maang kar pehen liya tha, woh gum ho gaya. Rasool Allah Sallallahu Alaihi Wasallam ne ek aadmi ko is ki talash ke liye bheja, jise woh mil gaya. Phir namaz ka waqt aa pahuncha aur logon ke pas (jo haar ki talash mein gaye thay) pani nahi tha. Logon ne namaz padh li aur Rasool Allah Sallallahu Alaihi Wasallam se is ke mutaliq shikayat ki. Pas Allah Tabarak wa Ta’ala ne tayammum ki ayat utari jise sun kar Usaid bin Huzair ne Aisha Razi Allah Anha se kaha Aap ko Allah behtareen badla de. Wallah jab bhi Aap ke sath koi aisi baat pesh aayi jis se Aap ko takleef hui to Allah Ta’ala ne Aap ke liye aur tamam musalmanon ke liye is mein khair paida farma di. 104670

Jab pani na paaye aur namaz fote hone ka khauf ho. Ata bin Abi Rabah ka yehi qaul hai aur Imam Hasan Basri ne kaha ke agar kisi bimar ke nazdeek pani ho jise woh utha na sake aur koi aisa shakhs bhi wahan na ho jo use woh pani (utha kar) de sake to woh tayammum kar le. Aur Abdullah bin Umar Jurf ki apni zameen se wapas aa rahe thay ke asr ka waqt maqam-e-Mirbad al-Naam mein aa gaya. Aap ne (tayammum se) asr ki namaz padh li aur Madinah pahunche to sooraj abhi buland tha magar Aap ne woh namaz nahi lautayi. 104671

Hum se Yahya bin Bukair ne bayan kiya, unhon ne kaha hum se Laith bin Saad ne bayan kiya, unhon ne Jafar bin Rabia se, unhon ne Abdur Rahman Aaraj se, unhon ne kaha main ne Ibn Abbas Razi Allah Anhuma ke ghulam Umair bin Abdullah se suna, unhon ne kaha ke main aur Abdullah bin Yasar jo ke Maimunah Razi Allah Anha zauja Nabi Kareem Sallallahu Alaihi Wasallam ke ghulam thay, Abu Juhaim bin Haris bin Summah Ansari (Sahabi) ke paas aaye. Unhon ne bayan kiya ke Nabi Kareem Sallallahu Alaihi Wasallam ”Bir-e-Jamal“ ki taraf se tashreef la rahe thay, raste mein ek shakhs ne Aap ko salam kiya (yani khud usi Abu Juhaim ne) lekin Aap Sallallahu Alaihi Wasallam ne jawab nahi diya. Phir Aap diwar ke qareeb aaye aur apne chehre aur hathon ka masah kiya phir un ke salam ka jawab diya. 104672

Hum se Adam bin Abi Iyas ne bayan kiya, unhon ne kaha hum se Shuba ne bayan kiya, unhon ne kaha hum se Hakam bin Uyainah ne bayan kiya, unhon ne Zarr bin Abdullah se, unhon ne Saeed bin Abdur Rahman bin Abza se, woh apne baap se, unhon ne bayan kiya ke ek shakhs Umar bin Khattab Razi Allah Anhu ke paas aaya aur arz ki ke mujhe ghusl ki hajat ho gayi aur pani nahi mila (to main ab kya karoon) is par Ammar bin Yasir Razi Allah Anhuma ne Umar bin Khattab Razi Allah Anhu se kaha, kya aap ko yaad nahi jab main aur aap safar mein thay, hum donon junbi ho gaye. Aap ne to namaz nahi padhi lekin main ne zameen par loot poat liya, aur namaz padh li. Phir main ne Nabi Kareem Sallallahu Alaihi Wasallam se is ka zikr kiya to Aap Sallallahu Alaihi Wasallam ne farmaya ke tujhe bas itna hi kafi tha aur aap ne apne donon hath zameen par mare phir unhein phoonka aur donon se chehre aur pahonchon ka masah kiya. 104673

Hum se Hajjaj bin Minhal ne bayan kiya, kaha hum se Shuba ne kaha ke mujhe Hakam bin Uyainah ne khabar di Zarr bin Abdullah se, woh Saeed bin Abdur Rahman bin Abza se, woh apne baap se ke Ammar ne yeh waqia bayan kiya (jo pehle guzar chuka) aur Shuba ne apne hathon ko zameen par mara. Phir unhein apne munh ke qareeb kar liya (aur phoonka) phir un se apne chehre aur pahonchon ka masah kiya aur Nazr bin Shumail ne bayan kiya ke mujhe Shuba ne khabar di Hakam se ke main ne Zarr bin Abdullah se suna, woh Saeed bin Abdur Rahman bin Abza ke hawala se hadees riwayat karte thay. Hakam ne kaha ke main ne yeh hadees Ibn Abdur Rahman bin Abza se suni, woh apne walid ke hawala se bayan karte thay ke Ammar ne kaha (jo pehle mazkoor hua). 104674

Hum se Sulaiman bin Harb ne bayan kiya, kaha hum se Shuba ne Hakam ke wasita se hadees bayan ki, woh Zarr bin Abdullah se, woh Ibn Abdur Rahman bin Abza se, woh apne baap se ke woh Umar Razi Allah Anhu ki khidmat mein hazir thay aur Ammar Razi Allah Anhu ne un se kaha ke hum ek lashkar mein gaye hue thay. Pas hum donon junbi ho gaye. Aur (is mein hai ke bajaye «nafakha fihima» ke) unhon ne «tafala fihima» kaha. 104675

Hum se Muhammad bin Kaseer ne bayan kiya, kaha hum se Shuba ne Hakam se, woh Zarr bin Abdullah se, woh Saeed bin Abdur Rahman bin Abza se, woh apne baap Abdur Rahman bin Abza se, unhon ne bayan kiya ke Ammar Razi Allah Anhu ne Umar Razi Allah Anhu se kaha ke main to zameen mein loot poat ho gaya phir Nabi Kareem Sallallahu Alaihi Wasallam ki khidmat mein hazir hua to Aap Sallallahu Alaihi Wasallam ne farmaya ke tere liye sirf chehre aur pahonchon par masah karna kafi tha (zameen par letne ki zaroorat na thi). 104676

Hum se Muslim bin Ibrahim ne bayan kiya, kaha hum se Shuba ne Hakam se, unhon ne Zarr bin Abdullah se, unhon ne Saeed bin Abdur Rahman bin Abza se. Unhon ne Abdur Rahman bin Abza se, unhon ne kaha ke main Umar Razi Allah Anhu ki khidmat mein maujood tha ke Ammar Razi Allah Anhu ne un se kaha. Phir unhon ne poori hadees bayan ki. 104677