Hum se Muhammad bin Bashshar ne byaan kiya , kaha ke hum se Ghundar Muhammad bin Jafar ne byaan kiya kaha ke hum se Shu'bah ne byaan kiya aur un se Abu Ishaq ne unhon ne kaha ke main ne Aswad se suna unhon ne Abdullah bin Masood razi Allahu anhu se ke Makkah mein Nabi Karim salla Allahu alaihi wasallam ne Surah An-Najm ki tilawat ki aur sajdah tilawat kiya Aap salla Allahu alaihi wasallam ke paas jitne aadmi thay (Musalman aur kafir) un sab ne bhi Aap salla Allahu alaihi wasallam ke saath sajdah kiya albatta aik boorha shakhs (Umayyah bin Khalaf) apne haath mein kankari ya mitti utha kar apni peshani tak le gaya aur kaha mere liye yahi kaafi hai main ne dekha ke baad mein woh boorha halat-e-kufr mein hi mara gaya .

Hum se Muhammad bin Yusuf Faryabi ne byaan kiya , unhon ne kaha ke hum se Sufyan Sawri ne byaan kiya , unhon ne Saad bin Ibrahim bin Abdur Rahman bin Auf se byaan kiya , un se Abdur Rahman bin Hurmuz A'raj ne , un se Abu Hurairah razi Allahu anhu ne ke Nabi Karim salla Allahu alaihi wasallam juma ke din fajr ki namaaz mein «Alif Laam Meem Tanzeel As-Sajdah» aur «Hal ata alal insaan» (Surah Dahr) parha karte thay .

Hum se Sulaiman bin Harb aur Abul Nu'man bin Fadl ne byaan kiya , un donon ne kaha ke hum se Hammad bin Zaid ne byaan kiya , un se Ayyub ne byaan kiya , un se Ikrimah ne byaan kiya aur un se Abdullah bin Abbas razi Allahu anhuma ne farmaya ke Surah Saad ka sajdah kuch takeedi sajdon mein se nahi hai aur main ne Nabi Karim salla Allahu alaihi wasallam ko sajdah karte huay dekha .

Is ko Abdullah bin Abbas razi Allahu anhuma ne Nabi Karim salla Allahu alaihi wasallam se naqal kiya hai .

Hum se Hafs bin Umar ne byaan kiya , kaha ke hum se Shu'bah ne , Abu Ishaq se byaan kiya , un se Aswad ne , un se Abdullah bin Masood razi Allahu anhu ne ke Nabi Karim salla Allahu alaihi wasallam ne Surah An-Najm ki tilawat ki aur is mein sajdah kiya is waqt qaum ka koi fard (Musalman aur kafir) bhi aisa na tha jis ne sajdah na kiya ho . Albatta aik shakhs (Umayyah bin Khalaf) ne haath mein kankari ya mitti le kar apne chehra tak uthayi aur kaha ke mere liye yahi kaafi hai . Abdullah bin Masood razi Allahu anhu ne kaha ke baad mein main ne dekha ke woh kufr ki halat hi mein qatal hua .

Halanke mushrik napak hai (us ko wuzu kahan se aaya) aur Abdullah bin Umar razi Allahu anhuma be-wuzu sajdah kiya karte thay .

Hum se Musaddad bin Musarhad ne byaan kiya , kaha ke hum se Abdul Waris ne byaan kiya , kaha hum se Ayyub Sakhtiyani ne byaan kiya , un se Ikrimah ne , un se Ibn Abbas razi Allahu anhuma ne ke Nabi Karim salla Allahu alaihi wasallam ne Surah An-Najm mein sajdah kiya to Musalmanon , mushrikon aur jinn o ins sab ne Aap salla Allahu alaihi wasallam ke saath sajdah kiya . Is hadees ki riwayat Ibrahim bin Tahman ne bhi Ayyub Sakhtiyani se ki hai .

Hum se Sulaiman bin Dawood Abul Rabi ne byaan kiya , unhon ne kaha ke hum se Ismail bin Jafar ne byaan kiya , kaha ke hamen Yazid bin Khusayfah ne khabar di , unhen (Yazid bin Abdullah) Ibn Qasit ne , aur unhen Ata bin Yasar ne ke unhon ne Zaid bin Sabit razi Allahu anhu se sawal kiya . Aap ne yaqeen ke saath is amar ka izhaar kiya ke Nabi Karim salla Allahu alaihi wasallam ke saamne Surah An-Najm ki tilawat aap ne ki thi aur Nabi Karim salla Allahu alaihi wasallam ne is mein sajdah nahi kiya .

Hum se Adam bin Abi Iyas ne byaan kiya , kaha ke hum se Ibn Abi Zi'b ne byaan kiya , kaha ke hum se Yazid bin Abdullah bin Qasit ne byaan kiya , un se Ata bin Yasar ne , un se Zaid bin Sabit razi Allahu anhu ne kaha ke main ne Rasool Allah salla Allahu alaihi wasallam ke saamne Surah An-Najm ki tilawat ki aur Aap salla Allahu alaihi wasallam ne is mein sajdah nahi kiya .

Hum se Muslim bin Ibrahim aur Muaz bin Fudalah ne byaan kiya , unhon ne kaha ke hum se Hisham bin Abi Abdullah Dastawa'i ne byaan kiya , un se Yahya bin Abi Kaseer ne , un se Abu Salamah ne kaha ke main ne Abu Hurairah razi Allahu anhu ko Surah «iza as-samaa un shaqqat» parhte dekha . Aap ne is mein sajdah kiya main ne kaha ke aye Abu Hurairah! kya main ne aap ko sajdah karte huay nahi dekha hai . Aap ne kaha ke agar main Nabi Karim salla Allahu alaihi wasallam ko sajdah karte na dekhta to main bhi na karta .