Aur Allah paak ne (Surah Aal-e-Imran mein) farmaya logon par farz hai ke Allah ke liye Khana-e-Kaaba ka Hajj karein jis ko wahan tak raah mil sake . Aur jo na maane (aur bawajood qudrat ke Hajj ko na jaye) to Allah saare jahan se be-niyaz hai .

Hum se Abdullah bin Yusuf ne byaan kiya , unhon ne kaha ke humein Imam Malik ne khabar di unhein Ibn Shihab ne , unhein Sulayman bin Yasaar ne , aur un se Abdullah bin Abbas razi Allahu anhuma ne byaan kiya ke Fadhal bin Abbas (Hajjat-ul-Wada mein) Rasool Allah salla Allahu alaihi wasallam ke saath sawari ke peeche baithe hue thay ke qabila-e-Khath'am ki ek khoobsurat aurat aayi . Fadhal us ko dekhne lage woh bhi unhein dekh rahi thi . Lekin Rasool Allah salla Allahu alaihi wasallam Fadhal razi Allahu anhu ka chehra baar baar doosri taraf mor dena chahte thay . Is aurat ne kaha Ya Rasool Allah! Allah ka fareezah-e-Hajj mere walid ke liye ada karna zaroori ho gaya hai . Lekin woh bahut boorhe hain oontni par baith nahi sakte . Kya main in ki taraf se Hajj (badal) kar sakti hoon ? Aap salla Allahu alaihi wasallam ne farmaya ke haan . Yeh Hajjat-ul-Wada ka waqia tha .