Aur Buraydah Aslami sahabi razi Allahu anhu ne wasiyat ki thi ke un ki qabr par do shakhein laga di jayein aur Abdullah bin Umar razi Allahu anhuma ne Abdur Rahman bin Abi Bakr razi Allahu anhu ki qabr par ek khaima tana hua dekha to kehne lage ke ae ghulam! ise ukhaar daal ab un par un ka amal saaya kare ga aur Kharija bin Zayd ne kaha ke Uthman razi Allahu anhu ke zamane mein main jawan tha aur chhalang lagane mein sab se zyada samjha jata jo Uthman bin Mazoon razi Allahu anhu ki qabr par chhalang laga kar is paar kood jata aur Uthman bin Hakeem ne byaan kiya ke Kharija bin Zayd ne mera haath pakar kar ek qabr par mujh ko bithaya aur apne chacha Yazid bin Thabit se riwayat kiya ke qabr par baithna is ko mana hai jo peshab ya pakhana ke liye is par baithe . Aur Nafi ne byaan kiya ke Abdullah bin Umar razi Allahu anhuma qabroon par baitha karte thay .

Hum se Yahya bin Jafar Baikandi ne byaan kiya , kaha ke hum se Abu Muawiya ne byaan kiya , un se Amash ne , un se Mujahid ne , un se Tawoos ne aur un se Ibn Abbas razi Allahu anhuma ne ke Nabi Karim salla Allahu alaihi wasallam ka guzar aisi do qabroon par hua jin mein azab ho raha tha . Aap salla Allahu alaihi wasallam ne farmaya ke in ko azab kisi bohat bari baat par nahin ho raha hai sirf yeh ke in mein ek shakhs peshab se nahin bachta tha aur doosra shakhs chughal khori kiya karta tha . Phir Aap salla Allahu alaihi wasallam ne khajoor ki ek hari daali li aur is ke do tukray kar ke donon qabr par ek ek tukra gaar diya . Logon ne poocha ke ya Rasool Allah! Aap ne aisa kyon kiya hai ? Aap salla Allahu alaihi wasallam ne farmaya ke shayad is waqt tak ke liye in par azab kuch halka ho jaye jab tak yeh khushk na hon .