Hum se Abu Mamar ne byaan kiya , kaha ke hum se Abdul Warith ne byaan kiya , un se Husayn Mualim ne , un se Abdullah bin Buraydah ne , unhon ne kaha ke mujh se Abdullah bin Mughaffal Muzani razi Allahu anhu ne byaan kiya un se Nabi Karim salla Allahu alaihi wasallam ne irshad farmaya ke Maghrib ke farz se pehle (sunnat ki do rakatain) parha karo . Teesri martaba Aap salla Allahu alaihi wasallam ne yoon farmaya ke jis ka jee chahe kyonke Aap salla Allahu alaihi wasallam ko yeh baat pasand na thi ke log ise lazmi samajh baithein .

Hum se Abdullah bin Yazid ne byaan kiya , kaha ke hum se Saeed bin Abi Ayub ne byaan kiya , kaha ke mujh se Yazid bin Abi Habib ne byaan kiya , unhon ne kaha ke mein ne Marsad bin Abdullah Yazani se suna ke mein Uqbah bin Aamir Juhani sahabi razi Allahu anhu ke paas aaya aur arz kiya Aap ko Abu Tamim Abdullah bin Malik par taajub nahin aaya ke woh Maghrib ki namaaz farz se pehle do rakat nafl parhte hain . Is par Uqbah ne farmaya ke hum bhi Rasool Allah salla Allahu alaihi wasallam ke zamane mein ise parhte thay . Main ne kaha phir ab is ke chhorhne ki kya wajah hai ? Unhon ne farmaya ke dunya ke karobar manay hain .