Aur Waleed bin Muslim ne kaha main ne Imam Awzai se Shurahbeel bin Simt aur un ke saathiyon ki namaaz ka zikr kiya ke unhon ne sawari par hi namaaz parh li , to unhon ne kaha hamara bhi yahi mazhab hai jab namaaz qaza hone ka darr ho . Aur Waleed ne Nabi Karim salla Allahu alaihi wasallam ke is isharah se daleel li ke koi tum mein se Asr ki namaaz na parhe magar Bani Qurayzah ke paas pahunch kar .

Hum se Abdullah bin Muhammad bin Asma ne byaan kiya , kaha ke hum se Juwayriyah bin Asma ne Nafi se , un se Abdullah bin Umar razi Allahu anhuma ne ke jab Nabi Karim salla Allahu alaihi wasallam Ghazwa-e-Khandaq se farigh hue (Abu Sufyan laute) to hum se Aap salla Allahu alaihi wasallam ne farmaya koi shakhs Banu Qurayzah ke muhalla mein pahunchne se pehle namaaz-e-Asr na parhe lekin jab Asr ka waqt aaya to baaz sahabah ne raasta hi mein namaaz parh li aur baaz sahabah razi Allahu anhum ne kaha ke hum Banu Qurayzah ke muhalla mein pahunchne par namaaz-e-Asr parhein ge aur kuch hazraat ka khayal yeh hua ke hamein namaaz parh leni chahiye kyunke Nabi Karim salla Allahu alaihi wasallam ka maqsad yeh nahi tha ke namaaz qaza kar lein . Phir jab Aap se is ka zikr kiya gaya to Aap salla Allahu alaihi wasallam ne kisi par bhi malamat nahi farmayi .