Aur Abu Saeed razi Allahu anhu ne Nabi Karim salla Allahu alaihi wasallam se naql kiya hai ke miswaak karni chahiye .

Hum se Abdullah bin Yusuf Taneesi ne byaan kiya , kaha ke hamein Imam Malik rahimahullah ne Abuz Zinad se khabar di , un se Araj ne , un se Abu Hurayrah razi Allahu anhu ne ke Rasool Allah salla Allahu alaihi wasallam ne farmaya ke agar mujhe apni ummat ya logon ki takleef ka khayal na hota to main har namaaz ke liye un ko miswaak ka hukm de deta .

Hum se Abu Mamar Abdullah ne byaan kiya , kaha ke hum se Abdul Warith ne byaan kiya , kaha ke hum se Shoaib bin Habhab ne byaan kiya , kaha ke hum se Anas razi Allahu anhu ne byaan kiya , unhon ne kaha ke Rasool Allah salla Allahu alaihi wasallam ne farmaya ke main tum se miswaak ke bare mein bohot kuch keh chuka hoon .

Hum se Muhammad bin Kathir ne byaan kiya , ke hamein Sufyan Thauri ne Mansoor bin Mamar aur Husayn bin Abdur Rahman se khabar di , unhein Abu Wail ne , unhein Hudhayfah bin Yaman razi Allahu anhu ne ke Nabi Karim salla Allahu alaihi wasallam jab raat ko uthte to munh ko miswaak se khoob saaf karte .