Hum se Ibrahim bin al-Munzir ne byaan kiya , kaha ke hum se Muhammad bin Ismail bin Abi Fudayk ne byaan kiya , kaha ke hum se Muhammad bin Abdur Rahman bin Abi Zib ne byaan kiya , Muqabri ke wastay se , unhon ne Abu Salamah bin Abdur Rahman se , unhon ne Aishah razi Allahu anha se ke Nabi Karim salla Allahu alaihi wasallam ke paas ek chataai thi . Jise Aap salla Allahu alaihi wasallam din mein bichhate thay aur raat mein us ka parda kar lete thay . Phir chand log Aap salla Allahu alaihi wasallam ke paas kharay huay ya Aap salla Allahu alaihi wasallam ki taraf jhuke aur Aap salla Allahu alaihi wasallam ke peeche namaaz parhne lage .

Hum se Abdul Aala bin Hammad ne byaan kiya , kaha ke hum se Wuhaib bin Khalid ne byaan kiya , kaha hum se Musa bin Uqbah ne byaan kiya , Abun Nadr Salim se , unhon ne Busr bin Saeed se , unhon ne Zaid bin Thabit razi Allahu anhu se ke Rasool Allah salla Allahu alaihi wasallam ne Ramzan mein ek hijra bana liya ya oot (parda) Busr bin Saeed ne kaha main samajhta hoon woh boriye ka tha . Aap ne kayi raat us mein namaaz parhi . Sahabah mein se baaz hazrat ne un raaton mein Aap ki iqtida ki . Jab Aap ko is ka ilm hua to Aap ne baith rehna shuru kiya (namaaz moqoof rakhi) phir baramad huay aur farmaya tum ne jo kiya woh mujh ko maloom hai , lekin logo! tum apne gharon mein namaaz parhte raho kyunke behtar namaaz aadmi ki wohi hai jo us ke ghar mein ho . Magar farz namaaz (masjid mein parhni zaroori hai) aur Iffan bin Muslim ne kaha ke hum se Wuhaib ne byaan kiya , kaha ke hum se Musa bin Uqbah ne byaan kiya , kaha ke main ne Abun Nadr ibn Abi Umayyah se suna , woh Busr bin Saeed se riwayat karte thay , woh Zaid bin Thabit se , woh Nabi Karim salla Allahu alaihi wasallam se .