Hum se Ahmad bin Yunus ne bayan kiya , kaha ke hum se Zuhair bin Muawiya Jafi ne bayan kiya , kaha ke hum se Sulaiman bin Tarkhan Taimi ne bayan kiya Abu Usman Abdur Rahman Nahdi se , unhon ne Abdullah bin Masood raziyallahu anhu se , unhon ne Nabi Karim salla Allahu alaihi wa sallam se ke aap salla Allahu alaihi wa sallam ne farmaya ke Bilal ki azan tumhein sehri khane se na rok de kyunke woh raat rahe se azan dete hain ya yeh kaha ke pukarte hain . Taake jo log ibadat ke liye jage hain woh aaram karne ke liye lot jayen aur jo abhi soye hue hain woh hoshiyar ho jayen . Koi yeh na samajh baithe ke fajr ya subah sadiq ho gayi aur aap ne apni ungliyon ke ishare se tulu subah ki kaifiyat batayi . Ungliyon ko upar ki taraf uthaya aur phir aahista se unhein neechay laye aur phir farmaya ke is tarah fajr hoti hai Zuhair raawi ne bhi shahadat ki ungli ek doosri par rakhi , phir unhein dayen bayen janib phela diya .

Mujh se Ishaq bin Rahwayh ne bayan kiya , unhon ne kaha humein Abu Usama Hammad bin Usama ne khabar di , kaha hum se Abdullah bin Umar ne bayan kiya , unhon ne Qasim bin Muhammad se aur unhon ne Aisha Siddiqa raziyallahu anha se bayan kiya aur Nafi ne Ibn Umar se yeh hadees bayan ki ke Rasool Allah salla Allahu alaihi wa sallam ne farmaya Bilal raat rahe mein azan dete hain . Abdullah Ibn Umm Maktum ki azan tak tum sehri kha pi sakte ho .

Imam Bukhari rahimahullah ne kaha ke mujh se Yusuf bin Isa ne bayan kiya , unhon ne kaha ke hum se Fazl bin Moosa ne , kaha ke hum se Ubaidullah bin Umar ne Qasim bin Muhammad se bayan kiya , unhon ne Aisha raziyallahu anha se , unhon ne Nabi Karim salla Allahu alaihi wa sallam se ke aap salla Allahu alaihi wa sallam ne farmaya ke Bilal raat rahe mein azan dete hain . Abdullah Ibn Umm Maktum ki azan tak tum sehri kha pi sakte ho .