Hum se Abdullah bin Yusuf Tinnisi ne bayan kiya , ke kaha humein Imam Malik ne Nafi se khabar di , unhon ne Ibn Umar raziyallahu anhuma se ke Rasool Allah salla Allahu alaihi wa sallam ne farmaya , koi tum mein se intizar mein na baitha rahe ke sooraj tulu hote hi namaz ke liye khara ho jaye , isi tarah sooraj ke doobne ke intizar mein bhi na rehna chahiye .

Hum se Abdul Aziz bin Abdullah ne bayan kiya , unhon ne kaha hum se Ibrahim bin Saad ne bayan kiya , unhon ne Saleh se yeh hadees bayan ki , unhon ne Ibn Shihab se , unhon ne kaha mujh se Ata bin Yazid Jundai Laithi ne bayan kiya ke unhon ne Abu Saeed Khudri raziyallahu anhu se suna . Unhon ne farmaya ke mein ne Nabi Karim salla Allahu alaihi wa sallam se suna , aap salla Allahu alaihi wa sallam farma rahe thay ke fajr ki namaz ke baad koi namaz sooraj ke buland hone tak na parhi jaye , isi tarah asr ki namaz ke baad sooraj doobne tak koi namaz na parhi jaye .

Hum se Muhammad bin Aban ne bayan kiya , kaha ke hum se Ghundar Muhammad bin Jafar ne bayan kiya , kaha ke hum se Shoba ne hadees bayan ki Abul Tayyah Yazid bin Humaid se , kaha ke mein ne Hamran bin Aban se suna , woh Muawiya bin Abi Sufyan raziyallahu anhuma se yeh hadees bayan karte thay ke unhon ne farmaya ke tum log to ek aisi namaz parhte ho ke hum Rasool Allah salla Allahu alaihi wa sallam ki suhbat mein rahe lekin hum ne kabhi aap salla Allahu alaihi wa sallam ko woh namaz parhte nahi dekha . Balkay aap salla Allahu alaihi wa sallam ne to is se mana farmaya tha . Muawiya raziyallahu anhu ki murad asr ke baad do rakaton se thi jisay aap ke zamane mein baaz log parhte thay .

Hum se Muhammad bin Salam ne bayan kiya , unhon ne kaha ke hum se Abdah ne bayan kiya , unhon ne Ubaidullah se khabar di , unhon ne Khubaib se , unhon ne Hafs bin Aasim se , unhon ne Abu Hurairah raziyallahu anhu se ke Nabi Karim salla Allahu alaihi wa sallam ne do waqt namaz parhne se mana farmaya , namaz fajr ke baad sooraj nikalne tak aur namaz asr ke baad sooraj ghuroob hone tak .