Hum se Hafs bin Umar ne bayan kiya , unhon ne kaha hum se Hisham Dastawai ne bayan kiya , unhon ne Qatada bin Diama se , unhon ne Abul Aliya Rafi se , unhon ne Ibn Abbas raziyallahu anhuma se farmaya ke mere samne chand mutabar hazrat ne gawahi di , jin mein sab se zyada mutabar mere nazdeek Umar raziyallahu anhu thay , ke Nabi Karim salla Allahu alaihi wa sallam ne fajr ki namaz ke baad sooraj buland hone tak aur asr ki namaz ke baad sooraj doobne tak namaz parhne se mana farmaya . Hum se Musaddad bin Musarhad ne bayan kiya , kaha hum se Yahya bin Saeed Qattan ne Shoba se , unhon ne Qatada se ke mein ne Abul Aliya se suna , woh Ibn Abbas raziyallahu anhuma se bayan karte thay ke unhon ne farmaya ke mujh se chand logon ne yeh hadees bayan ki . Jo pehle zikr hui .

Hum se Musaddad ne bayan kiya , kaha hum se Yahya bin Saeed Qattan ne Hisham bin Urwah se , unhon ne kaha ke mujhe mere walid Urwah ne khabar di , unhon ne kaha ke mujhe Abdullah bin Umar raziyallahu anhuma ne khabar di ke Rasool Allah salla Allahu alaihi wa sallam ne farmaya ke namaz parhne ke liye sooraj ke tulu aur ghuroob hone ke intizar mein na baithe raho .

Urwah ne kaha mujh se Abdullah bin Umar raziyallahu anhuma ne bayan kiya ke Rasool Allah salla Allahu alaihi wa sallam ne farmaya ke jab sooraj ka upar ka kinara tulu hone lage to namaz na parho yahan tak ke woh buland ho jaye . Aur jab sooraj doobne lage is waqt bhi namaz na parho , yahan tak ke ghuroob ho jaye . Is hadees ko Yahya bin Saeed Qattan ke sath Abdah bin Sulaiman ne bhi riwayat kiya hai .

Hum se Ubaid bin Ismail ne bayan kiya , unhon ne Abi Usama ke wastay se bayan kiya . Unhon ne Ubaidullah bin Umar se , unhon ne Khubaib bin Abdur Rahman se , unhon ne Hafs bin Aasim se , unhon ne Abu Hurairah raziyallahu anhu se ke Nabi Karim salla Allahu alaihi wa sallam ne do tarah ki khareed o farokht aur do tarah ke libas aur do waqton ki namazon se mana farmaya . Aap salla Allahu alaihi wa sallam ne namaz fajr ke baad sooraj nikalne tak aur namaz asr ke baad ghuroob hone tak namaz parhne se mana farmaya aur kapron mein ishtimal sama yani ek kapra apne upar is tarah lapet lena ke sharmgah khul jaye . Aur ihtiba yani ek kapre mein got maar kar baithne se mana farmaya . Aur khareed o farokht mein aap salla Allahu alaihi wa sallam ne munabiza aur mulamisa se mana farmaya .