Aur Nabi Karim salla Allahu alaihi wasallam ne farmaya ke afzhal kalam chaar hain , Sub-haanallaah , Al-hamdu lillaah , Laa ilaaha illallaah , Allaahu akbar aur Abu Sufyan ne bayan kiya ke Nabi Karim salla Allahu alaihi wasallam ne Heraclius ko likha thu , aa jao is kalma ki taraf jo hamare aur tumhare darmiyan barabar maana jata hai . Mujahid ne kaha ke «kalimat-ut-taqwaa» Laa ilaaha illallaah hai .

Hum se Abu al-Yaman ne bayan kiya, unhon ne kaha hum ko Shuayb ne khabar di, in se Zuhri ne bayan kiya, unhein Saeed bin al-Musayyab ne khabar di, in ke walid (Musayyab razi Allahu anhu) ne bayan kiya ke jab Janab Abu Talib ki maut ki waqt qareeb hua to Rasool Allah salla Allahu alaihi wasallam in ke paas aaye aur kaha ke Aap keh dijiye ke ”Laa ilaaha illallaah“ to main Aap ke liye Allah se jhagarr sakoon ga.

Hum se Qutaybah bin Saeed ne bayan kiya, unhon ne kaha hum se Muhammad bin Fuzhail ne bayan kiya, unhon ne kaha hum se Ammarah bin Qaqaa ne bayan kiya, unhon ne kaha hum se Abu Zurah ne bayan kiya aur in se Abu Hurairah razi Allahu anhu ne bayan kiya ke Rasool Allah salla Allahu alaihi wasallam ne farmaya ”do kalme jo zaban par halke hain lekin tarazu par (aakhirat mein) bhaari hain aur Allah Rahman ke yahan pasandida hain woh yeh hain «sub-haanallaahi wa bi-hamdihee, sub-haanallaah-il-azheemi» .“

Hum se Musa bin Ismail ne bayan kiya, kaha hum se Abd-ul-Wahid ne bayan kiya, kaha hum se Aamash ne bayan kiya, in se Shaqeeq ne aur in se Abdullah bin Masood razi Allahu anhu ne bayan kiya ke Rasool Allah salla Allahu alaihi wasallam ne farmaya ”aur main ne (isi par qiyas karte huay) doosra kalma kaha (ke Nabi Karim salla Allahu alaihi wasallam ne farmaya ke) jo shakhs is haal mein mar jaye ga ke Allah ke saath kisi ko shareek thehrata ho ga to woh jahannum mein jaye ga.“ Aur main ne doosri baat kahi ke jo shakhs is haal mein mar jaye ga ke Allah ke saath kisi ko shareek na thehrata ho ga woh jannat mein jaye ga.