Hum se Muhammad bin Alaa ne bayan kiya , kaha hum se Abu Usamah ne bayan kiya , in se Burayd bin Abdullah bin Abi Burdah ne in se Abu Burdah ne , aur in se Abu Musa razi Allahu anhu ne bayan kiya ke Rasool Allah salla Allahu alaihi wasallam ne farmaya ”meri aur jo kuch kalam Allah ne mere saath bheja hai is ki misal ek aise shakhs jaisi hai jo apni qaum ke paas aaya aur kaha ke main ne (tumhare dushman ka) lashkar apni aankhon se dekha hai aur main waazih daraanay wala hoon . Pas bhago , pas bhago (apni jaan bachao) is par ek jama'at ne is ki baat maan li aur raat hi raat itminan se kisi mahfooz jagah par nikal gaye aur najat paayi . Lekin doosri jama'at ne usay jhutlaya aur dushman ke lashkar ne subah ke waqt achanaak unhein aa liya aur tabah kar diya .“

Hum se Abu al-Yaman ne bayan kiya , kaha hum ko Shuayb ne khabar di , kaha hamase Abu al-Zinad ne bayan kiya , in se Abd-ul-Rahman ne bayan kiya , unhon ne Abu Hurairah razi Allahu anhu se suna aur unhon ne Rasool Allah salla Allahu alaihi wasallam se suna Aap salla Allahu alaihi wasallam ne farmaya ke meri aur logon ki misal ek aise shakhs ki hai jis ne aag jalayi , jab is ke charon taraf roshni ho gayi to parwanay aur yeh keere makoray jo aag par girte hain is mein girne lage aur aag jalaane wala unhein is mein se nikaalne laga lekin woh is ke qaaboo mein nahi aaye aur aag mein girte rahe . Isi tarah main tumhari kamar ko pakar kar aag se tumhein nikaalta hoon aur tum ho ke isi mein girte jaate ho .

Hum se Abu Nuaym ne bayan kiya , kaha hum se Zakariya ne bayan kiya , in se Aamir ne bayan kiya , unhon ne Abdullah bin Umar razi Allahu anhuma ne suna , kaha ke Nabi Karim salla Allahu alaihi wasallam ne farmaya ”Musalman woh hai jo Musalmanon ko apni zaban aur hath se (takleef pahunchne se) mahfooz rakkhe aur muhajir woh hai jo in cheezon se ruk jaye jis se Allah ne mana kiya hai .“