Hum se Ahmad bin Ishaq Surmari ne bayan kiya , unhon ne kaha ke hum se Israil ne Abu Ishaq ke wastay se bayan kiya . Unhon ne Amr bin Maimoon se , unhon ne Abdullah bin Masood raziyallahu anhu se , kaha ke Rasool Allah salla Allahu alaihi wa sallam Kaaba ke pas khare namaz parh rahe thay . Quraish apni majlis mein qareeb hi baithe hue thay . Itne mein un mein se ek Quraishi bola is riyakar ko nahi dekhte ? kya koi hai jo falaa qabeela ke zabah kiye hue oont ka gobar , khoon aur ojhri utha laye . Phir yahan intizar kare . Jab yeh Nabi Karim salla Allahu alaihi wa sallam sajda mein jaye to gardan par rakh de chunanche is kaam ko anjaam dene ke liye un mein se sab se zyada badbakht shakhs utha aur jab aap salla Allahu alaihi wa sallam sajda mein gaye to is ne aap salla Allahu alaihi wa sallam ki gardan mubarak par yeh ghalazaten daal di . Nabi Karim salla Allahu alaihi wa sallam sajda hi ki halat mein sar rakhe rahe . Mushrikeen yeh dekh kar hanse aur maare hansi ke ek doosre par lot pot hone lage . Ek shakhs ghaliban Ibn Masood raziyallahu anhu Fatima raziyallahu anha ke pas aaye . Woh abhi bacha thin . Aap raziyallahu anha daurti hui aayen . Nabi Karim salla Allahu alaihi wa sallam ab bhi sajda hi mein thay . Phir Fatima raziyallahu anha ne un ghalazaton ko aap salla Allahu alaihi wa sallam ke upar se hataya aur mushrikeen ko bura bhala kaha . Nabi Karim salla Allahu alaihi wa sallam ne namaz poori kar ke farmaya ya Allah Quraish par azab nazil kar . Ya Allah Quraish par azab nazil kar . Ya Allah Quraish par azab nazil kar . Phir naam le kar kaha ya Allah! Amr bin Hisham , Utba bin Rabia , Shaiba bin Rabia , Waleed bin Utba , Umayya bin Khalaf , Uqba bin Abi Muait aur Amara Ibn Waleed ko halak kar . Abdullah bin Masood raziyallahu anhu ne kaha , Allah ki qasam! mein ne un sab ko Badr ki larai mein maqtool paya . Phir unhein ghasit kar Badr ke kunwe mein phenk diya gaya . Is ke baad Rasool Allah salla Allahu alaihi wa sallam ne farmaya ke kunwe wale Allah ki rehmat se door kar diye gaye .