Abdullah bin Masood razi Allahu anhu ne kaha ke mujhe Nabi Karim salla Allahu alaihi wasallam ne tashahhud sikhaya to meri donon hatheliyaan Nabi Karim salla Allahu alaihi wasallam ki hatheliyon ke darmiyan thien aur Kabb bin Malik razi Allahu anhu ne bayan kiya ke main masjid mein dakhil hua to wahan Rasool Allah salla Allahu alaihi wasallam tashreef rakhte thay Talha bin Ubaidullah uth kar bari teizi se meri taraf badhe aur mujh se musaf-faha kiya aur (tauba qabool hone par) mujhe mubarak-baad di.

Hum se Amr bin Aasim ne bayan kiya, kaha hum se Humam ne bayan kiya in se Qatadah ne ke main ne Anas razi Allahu anhu se poochha, kiya musaf-faha ka dastoor Nabi Karim salla Allahu alaihi wasallam ke sahabah mein thu? Unhon ne kaha ke ji haan zaroor thu.

Hum se Yahya bin Sulayman ne bayan kiya, unhon ne kaha ke mujh se Ibn Wahb ne bayan kiya, unhon ne kaha ke mujhe Haywah ne khabar di, kaha ke mujh se Abu Aqeel Zhahra bin Ma'bad ne bayan kiya, unhon ne apne dada Abdullah bin Hisham razi Allahu anhu se suna, unhon ne bayan kiya ke hum Nabi Karim salla Allahu alaihi wasallam ke saath thay aur Nabi Karim salla Allahu alaihi wasallam Umar bin Khattab razi Allahu anhu ka hath pakre huay thay.