Hum se Abu al-Yaman ne bayan kiya, unhon ne kaha hum ko Shuayb ne khabar di, unhein Zuhri ne, unhon ne kaha ke mujhe Urwah ne khabar di, aur in se Aisha razi Allahu anha ne bayan kiya ke kuch Yahudi Rasool Allah salla Allahu alaihi wasallam ki khidmat mein hazir huay aur kaha ke «as-saamu alayka» (tumhein maut aaye) main in ki baat samajh gayi aur main ne jawab diya «alaykum-us-saamu wal-laanatu» Nabi Karim salla Allahu alaihi wasallam ne farmaya ke Aisha sabr se kaam le kyunke Allah Ta'ala tamam muamlat mein narmi ko pasand karta hai, main ne arz kiya: ya Rasool Allah! kiya Aap ne nahi suna ke unhon ne kiya kaha tha? Nabi Karim salla Allahu alaihi wasallam ne farmaya ke main ne in ko jawab de diya thu ke «wa alaykum» (aur tumhein bhi).

Hum se Abdullah bin Yusuf ne bayan kiya, unhon ne kaha hum ko Imam Malik ne khabar di, unhein Abdullah bin Dinar ne aur in se Abdullah bin Umar razi Allahu anhuma ne bayan kiya ke Rasool Allah salla Allahu alaihi wasallam ne farmaya ”jab tumhein Yahudi salam karein aur agar in mein se koi «as-saamu alayka» kahe to tum is ke jawab mein sirf «wa alayka» (aur tumhein bhi) keh diya karo.“

Hum se Usman bin Abi Shaybah ne bayan kiya, unhon ne kaha hum se Hushaim ne bayan kiya, unhein Abdullah bin Abi Bakr bin Anas ne khabar di, in se Anas bin Malik razi Allahu anhu ne bayan kiya ke Nabi Karim salla Allahu alaihi wasallam ne farmaya ”jab Ahl e Kitab tumhein salam karein to tum is ke jawab mein sirf «wa alaykum» kaho.“