Aur Yahya bin Saeed ne bayan kiya ke main ne Abu Umama bin Sahl razi Allahu anhu se suna, unhon ne bayan kiya ke hum Madinah Munawwarah mein qurbani ke janwar ko khila pila kar farba kiya karte thay aur aam Musalman bhi qurbani ke janwar ko isi tarah farba kiya karte thay.

Hum se Adam bin Abi Iyas ne bayan kiya, unhon ne kaha hum se Shubah ne bayan kiya, in se Abdul Aziz bin Suhayb ne bayan kiya, unhon ne Anas bin Malik razi Allahu anhu se suna ke unhon ne bayan kiya ke Nabi Karim salla Allahu alaihi wasallam do meindhon ki qurbani karte thay aur main bhi do meindhon ki qurbani karta tha.

Hum se Qutaybah bin Saeed ne bayan kiya, kaha hum se Abdul Wahhab ne bayan kiya, in se Ayub ne, in se Abu Qulabah ne aur in se Anas razi Allahu anhu ne ke Rasool Allah salla Allahu alaihi wasallam seing wale do chitkabre meindhon ki taraf mutawajjo huay aur unhein apne hath se zibah kiya. Is ki mutabia-t Wuhaib ne ki, in se Ayub ne aur Ismail aur Hakam bin Wardan ne bayan kiya ke in se Ayub ne, in se Muhammad bin Sireen ne aur in se Anas razi Allahu anhu ne bayan kiya.

Hum se Amr bin Khalid ne bayan kiya, kaha hum se Layth ne bayan kiya, in se Yazid ne, in se Abu al-Khair ne aur in se Uqbah bin Aamir razi Allahu anhu ne ke Nabi Karim salla Allahu alaihi wasallam ne apne sahabah mein taqseem karne ke liye Aap ko kuch qurbani ki bakriyaan dein unhon ne unhein taqseem kiya phir ek saal se kam ka ek bacha bach gaya to unhon ne Nabi Karim salla Allahu alaihi wasallam se is ka tazkira kiya. Nabi Karim salla Allahu alaihi wasallam ne farmaya ke is ki qurbani tum kar lo.