Aur Allah Ta'ala ka (Surah Maryam mein) Maryam alaiha-salam ko khitab «wa huz-zee ilaiki bi-jiz-in-nakhlati tusaaqit alaiki rutaban janiyy-ya» ”aur apni taraf khajoor ki shakh ko hila to tum par taza tarr khajoor girein ge .“

Aur Muhammad bin Yusuf ne bayan kiya , in se Sufyan ne bayan kiya , in se Mansoor bin Safiya ne , in se un ki walda ne bayan kiya aur in se Aisha razi Allahu anha ne bayan kiya ke Rasool Allah salla Allahu alaihi wasallam ki wafat ho gayi aur hum pani aur khajoor hi se (aksar dinon mein) pait bharte rahe .

Hum se Saeed bin Abi Maryam ne bayan kiya , kaha hum se Abu Ghassan ne bayan kiya , kaha ke mujh se Abu Hazim ne bayan kiya , in se Ibrahim bin Abdur Rahman bin Abdullah bin Abi Rabia ne aur in se Jabir bin Abdullah razi Allahu anhuma ne bayan kiya ke Madinah mein ek Yahudi tha aur woh mujhe qarz is shart par diya karta tha ke meri khajoorein tayyar hone ke waqt le le ga . Jabir razi Allahu anhu ki ek zameen Bir e Roomah ke rasta mein thi . Ek saal khajoor ke bagh mein phal nahi aaye . Phal chune jaane ka jab waqt aaya to woh Yahudi mere paas aaya lekin main ne to bagh se kuch bhi nahi tora tha . Is liye main aainda saal ke liye mohlat maangne laga lekin us ne mohlat dene se inkar kiya . Is ki khabar jab Rasool Allah salla Allahu alaihi wasallam ko di gayi to Aap ne apne sahabah se farmaya ke chalo , Yahudi se Jabir razi Allahu anhu ke liye hum mohlat maangein ge . Chunanche yeh sab mere bagh mein tashreef laye . Nabi Karim salla Allahu alaihi wasallam is Yahudi se guftagu farmate rahe lekin woh yahi kehta raha ke Abu al-Qasim main mohlat nahi de sakta . Jab Nabi Karim salla Allahu alaihi wasallam ne yeh dekha to Aap khare ho gaye aur khajoor ke bagh mein charon taraf phire phir tashreef laye aur is se guftagu ki lekin us ne ab bhi inkar kiya phir main khara hua aur thori si taza khajoor la kar Nabi Karim salla Allahu alaihi wasallam ke samne rakkhi . Nabi Karim salla Allahu alaihi wasallam ne in ko tanawul farmaya phir farmaya Jabir! Tumhari jhompri kahan hai ? Main ne Aap ko bataya to Aap salla Allahu alaihi wasallam ne farmaya ke is mein mere liye kuch farsh bichha do . Main ne bichha diya to Aap dakhil huay aur aaram farmaya phir bedar huay to main ek mutthi aur khajoor laya . Nabi Karim salla Allahu alaihi wasallam ne is mein se bhi tanawul farmaya phir Aap khare huay aur Yahudi se guftagu farmayi . Us ne ab bhi inkar kiya . Nabi Karim salla Allahu alaihi wasallam dobara bagh mein khare huay phir farmaya ke Jabir! Jao ab phal toro aur qarz ada kar do . Aap khajooron ke tore jaane ki jagah khare ho gaye aur main ne bagh mein se itni khajoorein tor lein jin se main ne qarz ada kar diya aur is mein se khajoorein bach bhi gayi phir main wahan se nikla aur Nabi Karim salla Allahu alaihi wasallam ki khidmat mein hazir ho kar yeh khush-khabri sunayi to Nabi Karim salla Allahu alaihi wasallam ne farmaya main gawahi deta hoon ke main Allah ka Rasool hoon . Abu Abdullah Imam Bukhari rahmahullah ne kaha ke is hadees mein jo «aroosh» ka lafz hai «aroosh» aur «areesh» imarat ki chhat ko kehte hain . Ibn Abbas razi Allahu anhuma ne kaha ke (Surah al-An'aam mein lafz) «ma'rooshaat» se murad angoor waghaira ki tattiyaan hain . Doosri aayat (Surah al-Baqarah) «urooshuha khaawiyatun ala» yani apni chhaton par gire huay .