Hum se Muhammad bin Salam ne byaan kiya, kaha hum se Ismail bin Jafar ne khabar di, unhein Humayd ne aur un se Anas razi Allahu anhu ne byaan kiya ke Nabi Karim salla Allahu alaihi wasallam ne Madinah aur Khaibar ke darmiyan (rasta mein) teen din tak qiyam kiya aur wahan Umm al-Momineen Safiya bint Huyay razi Allahu anha ke saath khilwat ki. Main ne Musalmanon ko Nabi Karim salla Allahu alaihi wasallam ke walima par bulaya lekin is dawat mein roti aur gosht nahi tha. Aap ne dastar-khwan bichhane ka hukm diya aur is par khajoor, paneer aur ghee rakh diya gaya aur yahi Nabi Karim salla Allahu alaihi wasallam ka walima tha. Musalmanon ne Safiya razi Allahu anha ke baare mein (kaha ke) Ummahat al-Momineen mein se hain ya Nabi Karim salla Allahu alaihi wasallam ne unhein laundi hi rakkha hai (kyunke woh bhi Jang e Khaibar ke qaidiyon mein se thien. Is par baaz ne kaha ke agar Aap salla Allahu alaihi wasallam un ke liye parda karayein phir to woh Ummahat al-Momineen mein se hain aur agar Aap un ke liye parda na karayein to phir woh laundi ki haisiyat se hain. Jab safar hua to Nabi Karim salla Allahu alaihi wasallam ne un ke liye apni sawari par peeche jagah banayi aur logon ke aur un ke darmiyan parda dalwaya.