Aur Allah ka farman «sunu-qri-uka fala tansa * illa ma shaa'allahu» ”hum Aap ko Quran parha dein ge phir Aap usay na bhoolein ge siwa in aayat ke jinhein Allah chahe .“

Hum se Rabia bin Yahya ne byaan kiya , unhon ne kaha hum se Za'ida bin Juzhamah ne byaan kiya , kaha hum se Hisham bin Urwah ne byaan kiya , un se Urwah bin Zubayr ne aur un se Aisha razi Allahu anha ne byaan kiya ke Nabi Karim salla Allahu alaihi wasallam ne ek shakhs ko masjid mein Quran parhte suna to Aap salla Allahu alaihi wasallam ne farmaya ke Allah is par raham kare , is ne mujhe falan surat ki falan falan aayatein yaad dila dien .

Hum se Muhammad bin Ubaid bin Maymoon ne byaan kiya , kaha hum se Esa bin Yunus ne byaan kiya , un se Hisham bin Urwah ne (izafa ke saath byaan kiya ke) main ne falan surat ki falan falan aayatein bhula di thien . Muhammad bin Ubaid ke saath is ko Ali bin Mushar aur Abdah ne bhi Hisham se riwayat kiya hai .

Hum se Ahmad bin Abi Rajaa ne byaan kiya , unhon ne kaha hum se Abu Usamah ne byaan kiya , in se Hisham bin Urwah ne , un se un ke walid (Urwah bin Zubayr) ne aur un se Aisha razi Allahu anha ne byaan kiya ke Rasool Allah salla Allahu alaihi wasallam ne ek sahab ko raat ke waqt ek surat parhte huay suna to farmaya ke Allah Ta'ala is shakhs par raham kare , is ne mujhe falan aayatein yaad dila dien jo mujhe falan falan suraton mein se bhula di gayi thien .

Hum se Abu Naeem ne byaan kiya , kaha hum se Sufyan bin Uyaynah ne byaan kiya , un se Mansoor ne , un se Abu Wail ne aur un se Abdullah bin Masood razi Allahu anhu ne byaan kiya ke Nabi Karim salla Allahu alaihi wasallam ne farmaya ke kisi ke liye yeh munasib nahi ke yeh kahe ke main falan falan aayatein bhool gaya balkay usay (yun kehna chahiye) ke main falan falan aayaton ko bhula diya gaya .