Aur Masrooq ne kaha , un se Aisha razi Allahu anha ne byaan kiya ke Fatima razi Allahu anha ne byaan kiya ke mujh se Rasool Allah salla Allahu alaihi wasallam ne chupke se farmaya tha ke Jibraeel alaihissalam mujh se har saal Quran Majeed ka daura karte thay aur is saal unhon ne mujh se do martaba daura kiya hai , main samajhta hoon ke is ki wajah yeh hai ke meri maut ka waqt aan pahuncha hai .

Hum se Yahya bin Qazah ne byaan kiya , kaha hum se Ibrahim bin Saad ne byaan kiya , un se Zuhri ne un se Abdullah bin Abdullah ne aur un se Ibn Abbas razi Allahu anhuma ne byaan kiya ke Nabi Karim salla Allahu alaihi wasallam khair khairat karne mein sab se zyada sakhi thay aur Ramzan mein Aap ki sakhawat ki to koi had hi nahi thi kyunke Ramzan ke mahinon mein Jibraeel alaihissalam Aap se aa kar har raat milte thay yahan tak ke Ramzan ka mahina khatam ho jata woh in raaton mein Nabi Karim salla Allahu alaihi wasallam ke saath Quran Majeed ka daura kiya karte thay . Jab Jibraeel alaihissalam Aap se milte to is zamana mein Nabi Karim salla Allahu alaihi wasallam taiz hawa se bhi barh kar sakhi ho jate thay .

Hum se Khalid bin Yazid ne byaan kiya , kaha hum se Abu Bakr bin Ayash ne byaan kiya , un se Abu Haseen ne , un se Abu Salih ne aur un se Abu Hurairah razi Allahu anhu ne byaan kiya ke Jibraeel alaihissalam Rasool Allah salla Allahu alaihi wasallam ke saath har saal ek martaba Quran Majeed ka daura kiya karte thay lekin jis saal Nabi Karim salla Allahu alaihi wasallam ki wafat hui is mein unhon ne Nabi Karim salla Allahu alaihi wasallam ke saath do martaba daura kiya . Nabi Karim salla Allahu alaihi wasallam har saal das din ka itikaaf kiya karte thay lekin jis saal Aap ki wafat hui is saal Aap ne bees din ka itikaaf kiya .