Hum se Abu Mamar ne byaan kiya, kaha hum se Abdul Waris ne, kaha hum se Ayub ne, un se Hafsa bint Sireen ne aur un se Umm Atiyyah razi Allahu anha ne byaan kiya ke hum ne Rasool Allah salla Allahu alaihi wasallam se bai'at ki to Aap ne hamare samne is aayat ki tilawat ki «an la yushrikna billahi shay-an» ke saath kisi ko shareek nahi karein gi aur hamain nauha (yani mayyit par zor zor se rona peetna) karne se mana farmaya. Nabi Karim salla Allahu alaihi wasallam ki is mamanat par ek aurat (khud Umm Atiyyah razi Allahu anha) ne apna hath khainch liya aur arz kiya ke falan aurat ne nauha mein meri madad ki thi, main chahti hoon ke is ka badla chuka aaoon Nabi Karim salla Allahu alaihi wasallam ne is ka koi jawab nahi diya chunanche woh gayin aur phir dobara aa kar Nabi Karim salla Allahu alaihi wasallam se bai'at ki.

Hum se Abdullah bin Muhammad ne byaan kiya, kaha hum se Wahb bin Jareer ne byaan kiya, kaha ke hum se mere walid ne byaan kiya, unhon ne byaan kiya ke main ne Zubayr se suna, unhon ne Ikrimah se aur unhon ne Ibn Abbas razi Allahu anhuma se Allah Ta'ala ke irshad «wa la ya'seenaka fee maroofin» yani ”aur bhali baaton (aur achhe kaamon mein) Aap ki nafarmani na karein gi.“ Ke baare mein unhon ne kaha ke yeh bhi ek shart thi jise Allah Ta'ala ne (Nabi Karim salla Allahu alaihi wasallam se bai'at ke waqt) auraton ke liye zaroori qarar diya tha.

Hum se Ali bin Abdullah ne byaan kiya, kaha hum se Sufyan bin Uyaynah ne byaan kiya, kaha ke hum se Zuhri ne byaan kiya, kaha ke mujh se Abu Idrees ne byaan kiya aur unhon ne Ubadah bin Samit razi Allahu anhu se suna, unhon ne byaan kiya ke hum Nabi Karim salla Allahu alaihi wasallam ki khidmat mein hazir thay. Nabi Karim salla Allahu alaihi wasallam ne farmaya ke kya tum mujh se is baat par bai'at karo ge ke Allah Ta'ala ke saath kisi ko shareek na thehrao ge aur na zina karo ge aur na chori karo ge.“ Aap salla Allahu alaihi wasallam ne Surah an-Nisa ki aayatein parhien. Sufyan ne is hadees mein aksar yun kaha ke Aap ne yeh aayat parhi. Phir tum mein se jo shakhs is shart ko poora kare ga to is ka ajr Allah par hai aur jo koi in mein se kisi shart ki khilaf-warzi kar baitha aur is par usay saza bhi mil gayi to saza is ke liye kaffara ban jaye gi lekin kisi ne apne kisi ahad ke khilaf kiya aur Allah ne usay chhupa liya to woh Allah ke hawale hai Allah chahe to usay is par azab de aur agar chahe maaf kar de, Sufyan ke saath is hadees ko Abdur Razzaq ne bhi Mamar se riwayat kiya unhon ne Zuhri se aur yun hi kaha aayat parhi.

Hum se Muhammad bin Abdur Raheem ne byaan kiya, kaha hum se Haroon bin Maroof ne byaan kiya, kaha hum se Abdullah bin Wahb ne byaan kiya ke mujhe Ibn Jurayj ne khabar di, unhein Hasan bin Muslim ne khabar di, unhein Taoos ne aur un se Ibn Abbas razi Allahu anhuma ne byaan kiya ke main ne Rasool Allah salla Allahu alaihi wasallam aur Abu Bakr aur Umar aur Usman razi Allahu anhum ke saath Eid al-Fitr ki namaz parhi hai. In tamam buzurgon ne namaz khutba se pehle parhi thi aur khutba baad mein diya tha (ek martaba khutba se farigh hone ke baad) Nabi Karim salla Allahu alaihi wasallam utray goya ab bhi main Nabi Karim salla Allahu alaihi wasallam ko dekh raha hoon, jab Aap logon ko apne hath ke ishare se bitha rahe thay phir Aap saff cheerte huay aage barhay aur auraton ke paas tashreef laye. Bilal razi Allahu anhu Aap ke saath thay phir Aap ne yeh aayat tilawat ki «ya ayyuhan-nabiyyu izha jaa-akal mu'minatu yubayianaka ala alla yushrikna billahi shay-an wa la yasriqna wa la yazneena wa la yaqtulna auladahunna wa la ya'teena bi-buhtaanin yaftareenahu bayna aydeehinna wa arjulihinna» yani ”Ae Nabi! Jab momin auratein Aap ke paas aayein ke Aap se in baaton par bai'at karein ke Allah ke saath na kisi ko shareek karein gi aur na chori karein gi aur na bad-kaari karein gi aur na apne bachon ko qatl karein gi aur na bohtan lagayein gi jise apne hath aur paon ke darmiyan ghar lein“ Aap ne poori aayat aakhir tak parhi. Jab Aap salla Allahu alaihi wasallam aayat parh chuke to farmaya tum in sharait par qaim rehne ka waada karti ho? In mein se ek aurat ne jawab diya ji haan ya Rasool Allah! In ke siwa aur kisi aurat ne (sharam ki wajah se) koi baat nahi kahi. Hasan ko is aurat ka naam maloom nahi tha byaan kiya ke phir auraton ne sadqa dena shuru kiya aur Bilal razi Allahu anhu ne apna kapra phaila liya. Auratein Bilal razi Allahu anhu ke kapre mein chhalay aur angoothiyaan daalne lagein.