Aur Mujahid ne kaha ke «fa-azzazna» ay «shaddadna» yani hum ne zor diya . «ya hasratan alal ibaadi» yani Qayamat ke din kafir is par afsos karein ge (ya farishte afsos karein ge) ke unhon ne duniya mein paighambaron par thattha maara . «an tudrikal qamara» ka yeh matlab hai ke sooraj chaand ki roshni nahi chhupata aur na chaand sooraj ki . «saabiqun-nahari» ka matlab yeh hai ke yeh ek doosre ke peeche rawaan dawan hain . «naslakhu» hum raat mein se din nikal lete hain aur donon chal rahe hain . «wa khalaqna lahum mim-mislihi» se murad chaupaye hain . «fakihoona» khush o khurram (ya dil-lagi kar rahe hon ge) «jundun muhdaroona» yani hisab ke waqt hazir kiye jayein ge . Aur Ikrimah se manqool hai «mash-hoonin» ka maani bojhal , ladi hui . Ibn Abbas razi Allahu anhuma ne kaha «ta'irukum» yani tumhari museebatein (ya tumhara naseeba) . «yansiloona» ka maani nikal parein ge . «marqadina» nikalne ki jagah se (khwabgah yani qabr se) . «ahsainahu» hum ne is ko mahfooz kar liya hai . «makanatihim» aur «makanahum» donon ka maani ek hi hai yani apne thikanon mein , gharon mein .