Hum se Saeed bin Abi Maryam ne byaan kiya , unhon ne kaha hum ko Muhammad bin Jafar ne khabar di , unhon ne kaha ke mujh se Zayd bin Aslam ne byaan kiya , un se Ata bin Yasar aur un se Abu Saeed Khudri razi Allahu anhu ne byaan kiya ke Rasool Allah salla Allahu alaihi wasallam ke zamana mein chand munafiqeen aise thay ke jab Nabi Karim salla Allahu alaihi wasallam jihad ke liye tashreef le jate to yeh Madinah mein peeche reh jate aur peeche reh jaane par bahut khush hua karte thay lekin jab Nabi Karim salla Allahu alaihi wasallam wapas aate to uzr byaan karte aur qasmein kha lete balkay un ko aise kaam par tareef hona pasand aata jis ko unhon ne na kiya hota aur baad mein chakni cheeri baaton se apni baat banana chahte . Allah Ta'ala ne isi par yeh aayat «la yahsabannallazhina yafrahoona» aakhir aayat tak utari .

Mujh se Ibrahim bin Musa ne byaan kiya , kaha hum ko Hisham ne khabar di , unhein Ibn Jurayj ne khabar di , unhein Ibn Abi Mulaykah ne aur unhein Alqamah bin Waqqas ne khabar di ke Marwan bin Hakam ne (jab woh Madinah ke ameer thay) apne darban se kaha ke Rafi! Ibn Abbas razi Allahu anhuma ke yahan jao aur un se poocho ke aayat «la yahsabannallazhina yafrahoona» ki roo se to hum sab ko azab hona chahiye kyunke har ek aadmi in ni'maton par jo us ko mili hain , khush hai aur yeh chahta hai ke jo kaam us ne kiya nahi is par bhi is ki tareef ho . Abu Rafi ne Ibn Abbas razi Allahu anhuma se ja kar poocha , to Ibn Abbas razi Allahu anhuma ne kaha , tum Musalmanon se is aayat ka kya talluq! Yeh to Rasool Allah salla Allahu alaihi wasallam ne Yahudiyon ko bulaya tha aur un se ek deen ki baat poochi thi . (jo un ki aasmani kitab mein maujood thi) unhon ne asal baat ko to chhupaya aur doosri ghalat baat byaan kar di , phir bhi is baat ke khwahish-mand rahe ke Nabi Karim salla Allahu alaihi wasallam ke sawal ke jawab mein jo kuch unhon ne bataya hai is par un ki tareef ki jaye aur idhar asal haqiqat ko chhupa kar bhi bare khush thay . Phir Ibn Abbas razi Allahu anhuma ne is aayat ki tilawat «wa izh akhazhallahu meesaqallazhina ootul kitaba» ki ”aur woh waqt yaad karo jab Allah ne Ahl e Kitab se ahad liya tha ke kitab ko poori zahir kar dena logon par , aayat «yafrahoona bima aataw wa yuhibboona an yuhmadoo bima lam yafaloo» ”jo log apne kartooton par khush hain aur chahte hain ke jo kaam nahi kiye hain , un par bhi un ki tareef ki jaye .“ Tak . Hisham bin Yusuf ke saath is hadees ko Abdur Razzaq ne bhi Ibn Jurayj se riwayat kiya . Hum se Muhammad bin Muqatil ne byaan kiya , kaha hum ko Hajjaj bin Muhammad ne khabar di , unhon ne Ibn Jurayj se kaha mujh ko Ibn Abi Mulaykah ne khabar di , un ko Humayd bin Abdur Rahman bin Auf razi Allahu anhu ne ke Marwan ne apne darban Rafi se kaha , phir yahi hadees byaan ki .