Hum se Abdullah bin Muhammad Musandi ne byaan kiya , kaha hum se Yazid bin Haroon ne byaan kiya , un se Hisham bin Hassan ne byaan kiya , un se Muhammad bin Sireen ne , un se Ubaydah ne aur un se Ali razi Allahu anhu ne byaan kiya ke Nabi Karim salla Allahu alaihi wasallam ne farmaya . (doosri sanad) Imam Bukhari ne kaha ke mujh se Abdur Rahman bin Bashir bin Hakam ne byaan kiya , kaha hum se Yahya bin Saeed Qattan ne byaan kiya , un se Hisham bin Hassan ne , kaha ke mujh se Muhammad bin Sireen ne byaan kiya , un se Ubaydah bin Amr ne aur un se Ali razi Allahu anhu ne ke Nabi Karim salla Allahu alaihi wasallam ne Ghazwa Khandaq ke mauqa par farmaya tha , in kuffar ne hamain darmiyani namaz nahi parhne di , yahan tak ke sooraj ghuroob ho gaya , Allah un ki qabron aur gharon ko ya un ke peeton ko aag se bhar de . Qabron aur gharon ya peeton ke lafzon mein shak Yahya bin Saeed rawi ki taraf se hai .