Mujh se Abdullah bin Abi Shaybah Absi ne byaan kiya , kaha ke hum se Abdullah bin Idrees ne byaan kiya , un se Ismail bin Abi Khalid ne , un se Qays bin Abi Hazim ne aur un se Jareer bin Abdullah Bajali razi Allahu anhu ne byaan kiya ke (Yaman se wapsi par Madinah aane ke liye) main darya ke raste se safar kar raha tha . Is waqt Yaman ke do aadmiyon Zhul Kala aur Zhul Amr se meri mulaqat hui main un se Nabi Karim salla Allahu alaihi wasallam ki baatein karne laga is par Zhul Amr ne kaha: Agar tumhare sahib (yani Nabi Karim salla Allahu alaihi wasallam) wahi hain jin ka zikr tum kar rahe ho to un ki wafat ko bhi teen din guzar chuke . Yeh donon mere saath hi (Madinah) ki taraf chal rahe thay . Raste mein hamain Madinah ki taraf se aate huay kuch sawar dikhayi diye , hum ne un se poocha to unhon ne is ki tasdeeq ki ke Nabi Karim salla Allahu alaihi wasallam wafat pa gaye hain . Aap ke khaleefa Abu Bakr razi Allahu anhu muntakhab huay hain aur log ab bhi sab khairiyat se hain . In donon ne mujh se kaha ke apne sahib (Abu Bakr razi Allahu anhu) se kehna ke hum aaye thay aur In sha Allah phir Madinah aayein ge yeh keh kar donon Yaman ki taraf wapas chale gaye . Phir main ne Abu Bakr razi Allahu anhu ko un ki baaton ki ittila di to Aap ne farmaya ke phir unhein apne saath laye kyun nahi ? Bahut dinon baad khilafat e Umri mein Zhul Amr ne ek martaba mujh se kaha ke Jareer! Tumhara mujh par ihsan hai aur tumhein main ek baat bataoon ga ke tum Ahl e Arab is waqt tak khair o bhalayi ke saath raho ge jab tak tumhara tarz e amal yeh ho ga ke jab tumhara koi ameer wafat pa jaye ga to tum apna koi doosra ameer muntakhab kar liya karo ge . Lekin jab (amarat ke liye) talwar tak baat pahunch jaye to tumhare ameer baadshah ban jayein ge . Baadshahon ki tarah ghussa hua karein ge aur unhi ki tarah khush hua karein ge .