Hum se Abdullah bin Yusuf Tanisi ne byaan kiya ‘ kaha hum se Layth bin Masood ne ‘ kaha ke mujh se Aqeel bin Khalid ne byaan kiya ‘ un se Ibn Shihab ne ‘ kaha ke mujhe Ubaydullah bin Abdullah bin Utbah ne khabar di aur unhein Ibn Abbas razi Allahu anhuma ne khabar di ke Nabi Karim salla Allahu alaihi wasallam ne Ghazwa Fatah Makkah Ramzan mein kiya tha . Zuhri ne Ibn Saad se byaan kiya ke main ne Saeed bin Musayyab se suna ke woh bhi isi tarah byaan karte thay . Zuhri ne Ubaydullah se riwayat kiya ‘ un se Ibn Abbas razi Allahu anhuma ne byaan kiya ke (Ghazwa Fatah ke safar mein jate huay) Rasool Allah salla Allahu alaihi wasallam rozay se thay lekin jab Aap maqam Kadeed pahunche ‘ jo Qadeed aur Usfan ke darmiyan ek chashma hai to Aap salla Allahu alaihi wasallam ne roza tor diya . Is ke baad Nabi Karim salla Allahu alaihi wasallam ne roza nahi rakha yahan tak ke Ramzan ka mahina khatam ho gaya .

Mujh se Mahmood bin Ghaylan ne byaan kiya ‘ kaha hum ko Abdur Razzaq ne khabar di ‘ kaha hum ko Mamar ne khabar di ‘ kaha mujhe Zuhri ne khabar di ‘ unhein Ubaydullah bin Abdullah aur unhein Abdullah bin Abbas razi Allahu anhuma ne ke Nabi Karim salla Allahu alaihi wasallam (Fatah ke liye) Madinah se rawana huay . Aap ke saath (das ya barah hazar ka) lashkar tha . Is waqt Aap ko Madinah mein tashreef laye saarhay aath saal poore hone wale thay . Chunanche Nabi Karim salla Allahu alaihi wasallam aur Aap ke saath jo Musalman thay Makkah ke liye rawana huay . Nabi Karim salla Allahu alaihi wasallam bhi rozay se thay aur tamam Musalman bhi ‘ lekin jab Aap maqam Kadeed par pahunche jo Qadeed aur Usfan ke darmiyan ek chashma hai to Aap ne roza tor diya aur Aap ke saath Musalmanon ne bhi roza tor diya . Zuhri ne kaha ke Nabi Karim salla Allahu alaihi wasallam ke sab se aakhri amal par hi amal kiya jaye ga .

Mujh se Ayash bin Waleed ne byaan kiya ‘ kaha hum se Abdul Aala ne byaan kiya ‘ un se Khalid ne byaan kiya ‘ un se Ikrimah ne aur un se Ibn Abbas razi Allahu anhuma ne ke Nabi Karim salla Allahu alaihi wasallam Ramzan mein Hunayn ki taraf tashreef le gaye . Musalmanon mein baaz hazrat to rozay se thay aur baaz ne roza nahi rakha tha lekin jab Nabi Karim salla Allahu alaihi wasallam apni sawari par poori tarah baith gaye to Aap ne bartan mein doodh ya pani talab farmaya aur usay apni oontni par ya apni hatheli par rakha (aur phir pee liya) phir Aap ne logon ko dekha to jin logon ne pehle se roza nahi rakha tha ‘ unhon ne roza daron se kaha ke ab roza tor lo .

Aur Abdur Razzaq ne kaha hum ko Mamar ne khabar di ‘ unhein Ayub ne ‘ unhein Ikrimah ne aur unhein Ibn Abbas razi Allahu anhuma ne Nabi Karim salla Allahu alaihi wasallam se naqal kiya . Aur Hammad ne Ayub se riwayat kiya ‘ unhon ne Ikrimah se ‘ unhon ne Abdullah bin Abbas razi Allahu anhuma se aur unhon ne Nabi Karim salla Allahu alaihi wasallam se naqal kiya .

Hum se Ali bin Abdullah Madini ne byaan kiya ‘ kaha hum se Jareer ne byaan kiya ‘ un se Mansoor ne ‘ un se Mujahid ne ‘ un se Tawus ne aur un se Ibn Abbas razi Allahu anhuma ne byaan kiya ke Rasool Allah salla Allahu alaihi wasallam ne Ramzan mein (Fatah Makkah ka) safar shuru kiya . Aap salla Allahu alaihi wasallam rozay se thay lekin jab maqam Usfan par pahunche to pani talab farmaya . Din ka waqt tha aur Aap ne woh pani piya taake logon ko dikhla sakein phir Aap salla Allahu alaihi wasallam ne roza nahi rakha aur Makkah mein dakhil huay . Byaan kiya ke Ibn Abbas razi Allahu anhuma kaha karte thay ke Nabi Karim salla Allahu alaihi wasallam ne safar mein (baaz auqat) roza bhi rakha tha aur baaz auqat roza nahi bhi rakha . Is liye (safar mein) jis ka jee chahe roza rakhe aur jis ka jee chahe na rakhe . Musafir ke liye roza na rakhne ki ijazat hai . (riwayat mein Fatah Makkah ke liye safar karne ka zikr hai . Yahi bab se mutabaqat hai) .