Mujh se Abu Jafar Muhammad Bin Abdullah ne bayan kiya, kaha hum se Hujain Bin Musanna ne bayan kiya, kaha hum se Abdul Aziz Bin Abdullah Bin Abi Salama ne bayan kiya, un se Abdullah Bin Fazl ne, un se Sulaiman Bin Yasar ne, un se Jafar Bin Amr Bin Umayya Zamri Radi Allahu Anhu ne bayan kiya ke mein Ubaidullah Bin Adi Bin Khiyar Radi Allahu Anhu ke sath ravana hua. Jab Hims pahunche to mujh se Ubaidullah Radi Allahu Anhu ne kaha, Aap ko Wahshi (Ibn Harb Habshi jis ne Ghazwa Uhud mein Hamza Radi Allahu Anhu ko qatl kiya aur Hinda zauja-e-Abu Sufyan ne in ki lash ka misla kiya tha) se taaruf hai. Hum chal ke in se Hamza Radi Allahu Anhu ki shahadat ke bare mein maloom karte hain. Mein ne kaha ke theek hai zaroor chalo. Wahshi Hims mein maujood thay. Chunancha hum ne logon se in ke bare mein maloom kiya to humein bataya gaya ke wo apne makan ke saye mein baithe hue hain, jaise koi bara sa kappa ho. Unhon ne bayan kiya ke phir hum in ke pas aaye aur thori der in ke pas kharay rahe. Phir salam kiya to unhon ne salam ka jawab diya. Bayan kiya ke Ubaidullah ne apne amama ko jism par is tarah lipeyta rakha tha ke Wahshi sirf in ki aankhen aur paon dekh sakte thay. Ubaidullah ne pucha: Ai Wahshi! Kya tum ne mujhe pehchana? Ravi ne bayan kiya ke phir is ne Ubaidullah ko dekha aur kaha ke nahi, Allah ki qasam! Albatta mein itna jaanta hoon ke Adi Bin Khiyar ne ek aurat se nikah kiya tha. Ise Umm-e-Qattal Bint-e-Abil Aas kaha jata tha phir Makka mein is ke yahan ek baccha paida hua aur mein is ke liye kisi daya ki talash ke liye gaya tha. Phir mein is bacche ko is ki (razayi) maa ke pas le gaya aur is ki walida bhi sath thi. Ghaliban mein ne tumhare paon dekhe thay. Bayan kiya ke is par Ubaidullah Bin Adi Radi Allahu Anhu ne apne chehre se kapra hata liya aur kaha, humein tum Hamza Radi Allahu Anhu ki shahadat ke waqiat bata sakte ho? Unhon ne kaha ke haan, baat ye hui ke Badr ki larayi mein Hamza Radi Allahu Anhu ne Tuaima Bin Adi Bin Khiyar ko qatl kiya tha. Mere aaqa Jubair Bin Mut'im ne mujh se kaha ke agar tum ne Hamza Radi Allahu Anhu ko mere chacha (Tuaima) ke badle mein qatl kar diya to tum azad ho jao ge. Unhon ne bataya ke phir jab Quraish Ainain ki jung ke liye nikle. Ainain Uhud ki ek pahari hai aur is ke aur Uhud ke darmiyan ek wadi hail hai. To mein bhi in ke sath jung ke irada se ho liya. Jab (dono faujen aamne samne) larne ke liye saff ara ho gayi thin to (Quraish ki saff mein se) Sibaa Bin Abdul Uzza nikla aur is ne awaz di, hai koi larne wala? Bayan kiya ke (is ki is dawat-e-mubazirait par) Ameer Hamza Bin Abdul Muttalib Radi Allahu Anhu nikal kar aaye aur farmaya, Ai Sibaa! Ai Umm-e-Anmar ke bete! Jo aurton ke khatne kiya karti thi, tu Allah aur is ke Rasul se larne aaya hai? Bayan kiya ke phir Hamza Radi Allahu Anhu ne is par hamla kiya (aur ise qatl kar diya) ab wo waqia guzre hue din ki tarah ho chuka tha. Wahshi ne bayan kiya ke udhar mein ek chattan ke neeche Hamza Radi Allahu Anhu ki taak mein tha aur joon hi wo mujh se qareeb hue, mein ne in par apna chhota neza phaink kar mara, neza in ki naaf ke neeche ja kar laga aur in ki sareen ke paar ho gaya. Bayan kiya ke yahi in ki shahadat ka sabab bana, phir jab Quraish wapas hue to mein bhi in ke sath wapas aa gaya aur Makka mein muqeem raha. Lekin jab Makka bhi islami saltanat ke taht aa gaya to mein Taif chala gaya. Taif walon ne bhi Rasul Allah Sallallahu Alaihi Wasallam ki khidmat mein ek qasid bheja to mujh se wahan ke logon ne kaha ke ambiya kisi par zyadaiti nahi karte (is liye tum musalman ho jao. Islam qabool karne ke baad tumhari pichli tamam ghaltiyan maaf ho jayein gi) chunancha mein bhi in ke sath ravana hua. Jab Nabi Kareem Sallallahu Alaihi Wasallam ki khidmat mein pahuncha aur Aap ne mujhe dekha to daryaft farmaya, kya tumhara hi naam Wahshi hai? Mein ne arz kiya ke ji haan. Aap Sallallahu Alaihi Wasallam ne farmaya: Kya tum hi ne Hamza ko qatl kiya hota? Mein ne arz kiya, jo Nabi Kareem Sallallahu Alaihi Wasallam ko is muamle mein maloom hai wahi sahih hai. Aap Sallallahu Alaihi Wasallam ne is par farmaya: Kya tum aisa kar sakte ho ke apni surat mujhe kabhi na dikhao? Unhon ne bayan kiya ke phir mein wahan se nikal gaya. Phir Aap Sallallahu Alaihi Wasallam ki jab wafat hui to Musailma Kazzab ne khurooj kiya. Ab mein ne socha ke mujhe Musailma Kazzab ke khilaf jung mein zaroor shirkat karni chahiye. Mumkin hai mein ise qatl kar doon aur is tarah Hamza Radi Allahu Anhu ke qatl ka badal ho sake. Unhon ne bayan kiya ke phir mein bhi is ke khilaf jung ke liye musalmanon ke sath nikla. Is se jung ke waqiat sab ko maloom hain. Bayan kiya ke (maidan-e-jung mein) mein ne dekha ke ek shakhs (Musailma) ek deewar ki daraz se laga khara hai. Jaise gandumi rang ka koi oont ho. Sar ke baal muntashir thay. Bayan kiya ke mein ne is par bhi apna chhota neza phaink kar mara. Neza is ke seene par laga aur shanon ko paar kar gaya. Bayan kiya ke itne mein ek sahabi Ansari jhapte aur talwar se is ki khopri par mara. Unhon (Abdul Aziz Bin Abdullah) ne kaha, in se Abdullah Bin Fazl ne bayan kiya ke phir mujhe Sulaiman Bin Yasar ne khabar di aur unhon ne Abdullah Bin Umar (Radi Allahu Anhuma) se suna, wo bayan kar rahe thay ke (Musailma ke qatl ke baad) ek larki ne chhat par khari ho kar elaan kiya ke Ameer-ul-Momineen ko ek kale ghulam (yani Wahshi) ne qatl kar diya
.