Aur Allah Ta'ala ka farmana ”Aur yaqeenan Allah Ta'ala ne tumhari madad ki Badr mein jis waqt ke tum kamzor thay. To tum Allah se darte raho taake tum shukr guzar ban jao. Ay Nabi! Wo waqt yaad kijiye, jab aap iman walon se keh rahe thay, kya ye tumhare liye kafi nahi ke tumhara parwardigar tumhari madad ke liye teen hazar farishte utaar de, kyun nahi, bashart-e-ke tum sabr karo aur Allah se darte raho aur agar wo tum par foran aa parein to tumhara parwardigar tumhari madad paanch hazar nishan kiye hue farishton se kare ga aur ye to Allah ne is liye kiya ke tum khush ho jao aur tumhein is se itminan hasil ho jaye. Warna fatah to bas Allah Ghalib aur Hikmat wale hi ki taraf se hui hai aur ye nusrat is gharz se thi taake kafiron ke ek guroh ko halak kar de ya unhein aisa maghloob kar de ke wo nakam ho kar wapas laut jayein. Wahshi Radi Allahu Anhu ne kaha Hamza Radi Allahu Anhu ne Tuaimah Bin Adi Bin Khiyar ko Badr ki larai mein qatl kiya tha. Aur Allah Ta'ala ka farman (Surah-al-Anfal mein) ”Aur wo waqt yaad karo ke jab Allah Ta'ala tum se waada kar raha tha, do jamaaton mein se ek ke liye wo tumhare hath aa jaye gi“ aakhir tak
.

Mujh se Yahya Bin Bukair ne bayan kiya, unhon ne kaha hum se Lais ne bayan kiya, unhon ne kaha ke hum se Aqeel ne bayan kiya, un se Ibn Shihab ne bayan kiya, un se Abdur Rahman Bin Abdullah Bin Ka'b ne, un se Abdullah Bin Ka'b ne bayan kiya, unhon ne kaha ke mein ne Ka'b Bin Malik Radi Allahu Anhu se suna, unhon ne bayan kiya ke Rasul Allah Sallallahu Alaihi Wasallam ne jitne ghazwe kiye, mein ghazwa-e-Tabook ke siwa sab mein hazir raha. Albatta ghazwa-e-Badr mein shareek na ho saka tha lekin jo log is ghazwe mein shareek na ho sake thay, in mein se kisi par Allah ne itab nahi kiya. Kyunke Rasul Allah Sallallahu Alaihi Wasallam Quraish ke qafile ko talash karne ke liye nikle thay. (Larrne ki niyat se nahi gaye thay) magar Allah Ta'ala ne nagahani musalmanon ko un ke dushmanon se bhira diya
.