Hum se Musaddad ne bayan kiya, kaha hum se Yahya Bin Saeed Qattan ne, un se Sufyan Suri ne, kaha hum se Abdul Malik Bin Umair ne, un se Abdullah Bin Haris ne bayan kiya un se Abbas Bin Abdul Muttalib Radi Allahu Anhu ne bayan kiya ke unhon ne Nabi Kareem Sallallahu Alaihi Wasallam se poocha aap apne chacha (Abu Talib) ke kya kaam aaye ke wo aap ki himayat kiya karte thay aur aap Sallallahu Alaihi Wasallam ke liye gussa hote thay? Aap Sallallahu Alaihi Wasallam ne farmaya ”(isi wajah se) wo sirf takhnon tak jahannum mein hain agar mein un ki sifarish na karta to wo dozakh ki teh mein bilkul neeche hote.“
.

Hum se Mahmood Bin Ghailan ne bayan kiya, kaha hum se Abdur Razzaq ne bayan kiya, unhein Ma'mar ne khabar di, unhein Zuhri ne, unhein Saeed Bin Musayyib ne aur unhein un ke walid Musayyib Bin Huzn Sahabi Radi Allahu Anhu ne ke jab Abu Talib ki wafat ka waqt qareeb hua to Nabi Kareem Sallallahu Alaihi Wasallam un ke paas tashreef le gaye. Is waqt wahan Abu Jahl bhi baitha hua tha. Nabi Kareem Sallallahu Alaihi Wasallam ne farmaya ”chacha! Kalma La ilaha illallah ek martaba keh do, Allah ki bargah mein (aap ki bakhshish ke liye) ek yahi daleel mere hath aa jaye gi.“ Is par Abu Jahl aur Abdullah Bin Abi Umayyah ne kaha: Ay Abu Talib! Kya Abdul Muttalib ke deen se tum phir jao ge! Ye dono in hi par zor dete rahe aur aakhri kalma jo un ki zaban se nikla, wo ye tha ke mein Abdul Muttalib ke deen par qaim hoon. Phir Nabi Kareem Sallallahu Alaihi Wasallam ne farmaya ke mein un ke liye is waqt tak maghfirat talab karta rahoon ga jab tak mujhe is se mana na kar diya jaye ga. Chunanche (Surah-al-Bara'at mein) ye ayat nazil hui «Ma kana linnabiyyi wallazeena aamanu ay yastaghfiru lil mushrikeena walau kanu uli qurba mim ba'di ma tabayyana lahum annahum as-habul jaheemi» ”Nabi ke liye aur musalmanon ke liye munasib nahi hai ke mushrikeen ke liye dua maghfirat karein khwah wo un ke naate wale hi kyun na hon jab ke un ke samne ye baat wazeh ho gayi ke wo dozakhi hain.“ Aur Surah-al-Qasas mein ye ayat nazil hui «Innaka la tahdi man ahbabta» ”Beshak jise aap chahein hidayat nahi kar sakte.“
.

Hum se Abdullah Bin Yusuf ne bayan kiya, kaha hum se Lais Bin Saad ne bayan kiya, kaha hum se Yezid Bin Abdullah Ibn-al-Haad ne, un se Abdullah Bin Khabbab aur un se Abu Saeed Khudri Radi Allahu Anhu ne ke unhon ne Nabi Kareem Sallallahu Alaihi Wasallam se suna, aap Sallallahu Alaihi Wasallam ki majlis mein aap ke chacha ka zikr ho raha tha to aap Sallallahu Alaihi Wasallam ne farmaya ”shayad Qiyamat ke din unhein meri shafa'at kaam aa jaye aur unhein sirf takhnon tak jahannum mein rakkha jaye jis se un ka dimagh khole ga.“ Hum se Ibrahim Bin Hamza ne bayan kiya, kaha hum se Ibn Abu Hazim aur Dara Wurdi ne bayan kiya Yezid se isi mazkoora hadees ki tarah, albatta is riwayat mein ye bhi hai ke Abu Talib ke dimagh ka bheeja is se khole ga
.