Hum se Humaidi ne bayan kiya, kaha hum se Sufyan Bin Uyainah ne bayan kiya, kaha hum se Bayan Bin Bishr aur Ismail Bin Abu Khalid ne bayan kiya, kaha ke hum ne Qais Bin Abu Hazim se suna wo bayan karte thay ke mein ne Khabbab Bin Aratt se suna, unhon ne bayan kiya ke mein Rasul Allah Sallallahu Alaihi Wasallam ki khidmat mein hazir hua to Aap Sallallahu Alaihi Wasallam Kaabah ke saye tale chadar par taik lagaye baithe thay. Hum log mushrikeen se intehai takaleef utha rahe thay. Mein ne arz kiya: Ya Rasul Allah! Allah Ta'ala se Aap dua kyun nahi farmate? Is par Aap Sallallahu Alaihi Wasallam seedhe baith gaye. Chehra mubarak gusse se surkh ho gaya aur farmaya tum se pehle aise log guzar chuke hain ke lohe ke kanghon ko un ke gosht aur patthon se guzar kar un ki haddiyon tak pahuncha diya gaya aur ye mamla bhi unhein un ke deen se na pher saka, kisi ke sar par aara rakh kar is ke do tukre kar diye gaye aur ye bhi unhein un ke deen se na pher saka, is deen-e-Islam ko to Allah Ta'ala khud hi ek din tamam o kamal tak pahunchaye ga ke ek sawar Sana se Hazramaut tak (tanha) jaye ga aur (raste) mein ise Allah ke siwa aur kisi ka khauf tak na ho ga. Bayan ne apni riwayat mein ye zyada kiya ke ”siwaye bhediye ke ke is se apni bakriyon ke mamla mein ise darr ho ga.“
.

Hum se Sulaiman Bin Harb ne bayan kiya, kaha hum se Shuaib ne bayan kiya, un se Abu Ishaq ne, un se Aswad ne aur un se Abdullah Bin Masood Radi Allahu Anhu ne ke Nabi Kareem Sallallahu Alaihi Wasallam ne Surah-an-Najm parhi aur sajda kiya is waqt Aap Sallallahu Alaihi Wasallam ke sath tamam logon ne sajda kiya sirf ek shakhs ko mein ne dekha ke apne hath mein is ne kankariyan utha kar is par apna sar rakh diya aur kehne laga ke mere liye bas itna hi kafi hai. Mein ne phir ise dekha ke kufr ki halat mein wo qatl kiya gaya
.

Hum se Muhammad Bin Bashar ne bayan kiya, kaha hum se Ghundar ne bayan kiya, kaha hum se Shuba ne, un se Abu Ishaq ne, un se Amr Bin Maimoon ne aur un se Abdullah Bin Masood Radi Allahu Anhu ne bayan kiya ke Nabi Kareem Sallallahu Alaihi Wasallam (namaz parhte hue) sajda ki halat mein thay, Quraish ke kuch log wahin ard-gird mojood thay. Itne mein Uqbah Bin Abi Muait oont ki ojhri baccha daani laya aur Nabi Kareem Sallallahu Alaihi Wasallam ki peeth mubarak par ise daal diya. Is ki wajah se Aap Sallallahu Alaihi Wasallam ne apna sar nahi uthaya phir Fatimah Radi Allahu Anha aayin aur gandagi ko peeth mubarak se hataya aur jis ne aisa kiya tha ise baddua dein. Nabi Kareem Sallallahu Alaihi Wasallam ne bhi un ke haqq mein baddua ki ke ay Allah! Quraish ki is jamaat ko pakar le. Abu Jahl Bin Hisham, Utbah Bin Rabeeah, Shaibah Bin Rabeeah aur Umayyah Bin Khalaf ya (Umayyah ke bajaye Aap ne baddua) Ubayy Bin Khalaf (ke haqq mein farmai) shubha rawi hadees Shuba ko tha. Abdullah Bin Masood Radi Allahu Anhu ne kaha ke phir mein ne dekha ke Badr ki larai mein ye sab log qatl kar diye gaye aur ek kunwein mein unhein daal diya gaya tha siwaye Umayyah ya Ubayy ke ke is ka har ek jorr alag alag ho gaya tha is liye kunwein mein nahi dala ja saka
.

Hum se Usman Bin Abi Shaibah ne bayan kiya, kaha hum se Jarir ne bayan kiya, un se Mansoor ne, kaha mujh se Saeed Bin Jubair ne bayan kiya ya (Mansoor ne) is tarah bayan kiya ke mujh se Hakam ne bayan kiya, un se Saeed Bin Jubair ne bayan kiya ke mujh se Abdur Rahman Bin Abza Radi Allahu Anhu ne kaha ke Ibn Abbas Radi Allahu Anhuma se in dono aayaton ke mutaliq poocho ke in mein mutabiqat kis tarah paida ki jaye (ek ayat «Wa la taqtulu-nnafsallati harramallahu» aur doosri ayat «Wa may yaqtul mu'minam muta'ammidan» hai. Ibn Abbas Radi Allahu Anhuma se mein ne poocha to unhon ne batlaya ke jab Surah-ul-Furqan ki ayat nazil hui to mushrikeen-e-Makkah ne kaha hum ne to in jaanon ka bhi khoon kiya hai jin ke qatl ko Allah Ta'ala ne haram qarar diya tha hum Allah ke siwa doosre maboodon ki ibadat bhi karte rahe hain aur badkariyon ka bhi hum ne irtikab kiya hai. Is par Allah Ta'ala ne ayat nazil farmai «Illa man taba wa aamana» ”wo log is hukm se alag hain jo tauba kar lein aur iman le aayein“ to ye ayat un ke haqq mein nahi hai lekin Surah-an-Nisa ki ayat is shakhs ke bare mein hai jo Islam aur sharaye-e-Islam ke ahkam jaan kar bhi kisi ko qatl kare to is ki saza jahannum hai. Mein ne Abdullah Bin Abbas Radi Allahu Anhuma ke is irshad ka zikr Mujahid se kiya to unhon ne kaha ke wo log is hukm se alag hain jo tauba kar lein
.

Hum se Ayash Bin Walid ne bayan kiya, kaha hum se Walid Bin Muslim ne bayan kiya, kaha mujh se Awzai ne bayan kiya, un se Yahya Bin Abi Kaseer ne bayan kiya, un se Muhammad Bin Ibrahim Taimi ne bayan kiya ke mujh se Urwah Bin Zubair ne bayan kiya ke mein ne Abdullah Bin Amr Bin Aas Radi Allahu Anhuma se poocha ke mujhe mushrikeen ke sab se sakht zulm ke mutaliq batao jo mushrikeen ne Nabi Kareem Sallallahu Alaihi Wasallam ke sath kiya tha. Unhon ne kaha ke Nabi Kareem Sallallahu Alaihi Wasallam Hateem mein namaz parh rahe thay ke Uqbah Bin Abi Muait aaya aur zalim apna kapra Nabi Kareem Sallallahu Alaihi Wasallam ki gardan mubarak mein phansa kar zor se Aap Sallallahu Alaihi Wasallam ka gala ghoontne laga itne mein Abu Bakr Siddiq Radi Allahu Anhu aa gaye aur unhon ne is badbakht ka kandha pakar kar Nabi Kareem Sallallahu Alaihi Wasallam ke paas se ise hata diya aur kaha ke tum log ek shakhs ko sirf is liye maar dalna chahte ho ke wo kehta hai ke mera Rabb Allah hai al-Ayah. Ayash Bin Walid ke sath is riwayat ki mutabi'at Ibn Ishaq ne ki (aur bayan kiya ke) mujh se Yahya Bin Urwah ne bayan kiya aur un se Urwah ne ke mein ne Abdullah Bin Amr Radi Allahu Anhuma se poocha aur Abdah ne bayan kiya, un se Hisham ne, un se un ke walid ne ke Amr Bin-al-Aas Radi Allahu Anhu se kaha gaya aur Muhammad Bin Amr ne bayan kiya, un se Abu Salama ne, is mein yun hai ke mujh se Amr Bin-al-Aas Radi Allahu Anhu ne bayan kiya
.