Hum se Qabisah bin ’Uqbah ne bayan kiya, unhon ne kaha hum se Sufyan Thawri ne Mansoor bin Ma’mar ke waaste se, woh Ibrahim Nakha’ee se, woh Aswad se, woh Aisha Radhiallahu Anha se naql karte hain ke unhon ne farmaaya main aur Nabi-e-Kareem Sallallahu Alaihi Wasallam ek hi bartan mein ghusl karte the, halaanki dono junubi hote.

Aur Aap Sallallahu Alaihi Wasallam mujhe hukm farmaate, pas main izaar baandh leti, phir Aap Sallallahu Alaihi Wasallam mere saath mubaasharat karte, us waqt main haaiza hoti.

Aur Aap Sallallahu Alaihi Wasallam apna sar-e-mubarak meri taraf kar dete. Us waqt Aap Sallallahu Alaihi Wasallam aitekaaf mein baithe huwe hote aur main haiz ki haalat mein hone ke bawjood Aap Sallallahu Alaihi Wasallam ka sar-e-mubarak dho deti.

Hum se Ismail bin Khaleel ne bayan kiya, kaha hum se Ali bin Mus’hir ne, hum se Abu Ishaaq Sulaiman bin Firoz Shaibani ne Abdur Rehman bin Aswad ke waaste se, woh apne waalid Aswad bin Yazeed se, woh Aisha Radhiallahu Anha se ke aap ne farmaaya hum azwaaj mein se koi jab haaiza hoti, us haalat mein Rasoolullah Sallallahu Alaihi Wasallam agar mubaasharat ka iradah karte to Aap Sallallahu Alaihi Wasallam izaar baandhne ka hukm de dete bawjood haiz ki ziyaadti ke. Phir badan se badan milaate, aap ne kaha tum mein aisa kaun hai jo Nabi-e-Kareem Sallallahu Alaihi Wasallam ki tarah apni shehwat par qaabu rakhta ho. Is Hadees ki Mutaba’at Khalid aur Jareer ne Shaibani ki riwayat se ki hai. (Yahan bhi mubaasharat se saath letna baithna muraad hai).

Hum se Abu No’maan Muhammed bin Fazl ne bayan kiya, unhon ne kaha hum se Abdul Wahid bin Ziyaad ne bayan kiya, unhon ne kaha hum se Abu Ishaaq Shaibani ne bayan kiya, unhon ne kaha hum se Abdullah bin Shaddad ne bayan kiya, unhon ne kaha main ne Maimunah se suna, unhon ne kaha ke jab Nabi-e-Kareem Sallallahu Alaihi Wasallam apni biwiyon mein se kisi se mubaasharat karna chaahte aur woh haaiza hoti, to Aap Sallallahu Alaihi Wasallam ke hukm se, woh pehle izaar baandh leti. Aur Sufyan ne Shaibani se is ko riwayat kiya hai.