Qatada ne (Quran Majeed ki is ayat ke bare mein) "wa-laqad zaiyanna-s-sama-a-d-dunya bimasabiha" " ke hum ne zeenat di aasman dunya ko (taron ke) chiraghon se." Kaha ke Allah Ta'ala ne in sitaron ko teen faidon ke liye paida kiya hai. Unhein aasman ki zeenat banaya, Shayatin par marne ke liye banaya. Aur (raat ki andheriyon mein) unhein sahi rasta par chalte rehne ke liye nishanat qarar diya. Pas jis shakhs ne in ke siwa doosri baatein kahein, us ne ghalati ki, apna hissa tabah kiya (apna waqt zaya kiya ya apna iman kho diya) aur jo baat ghaib ki maloom nahi ho sakti us ko us ne maloom karna chaha. Ibn Abbas (Radi Allahu Anhuma) ne kaha ke Surah Al-Kahf mein lafz "hasheeman" hai is ka maane badla hua. "Al-Abbu" ke maane maweshiyon ka chara. Ye lafz Surah Abasa mein hai aur Surah Al-Rahman mein lafz "Al-Anamu" ba-maane makhluq hai aur lafz "barzakhun" ba-maane parda hai. Aur Mujahid tabee ne kaha ke lafz "alfafan" ba-maane "multaffatan" hai. Is ke maane gehre lapte hue. "Al-Ghulbu" bhi ba-maane "Al-Multaffatan" aur lafz "firashan" ba-maane "mihadan" hai. Jaise Allah Ta'ala ne Surah Al-Baqarah mein farmaya "wa-lakum fi-l-ardhi mustaqarrun" ("mustaqarrun" bhi ba-maane "mihadan" hai) aur Surah Al-Araf mein jo lafz "nakidan" hai is ka maane thoda hai
.