Hum se Usman Bin Abi Shaiba ne bayan kiya, kaha hum se Jarir ne bayan kiya, un se Mansur ne, un se Abu Wail ne aur un se Abdullah Bin Masood (Radi Allahu Anhu) ne bayan kiya ke mere paas ek shakhs aaya, aur aaisi baat poochi ke meri kuch samajh mein na aaya ke is ka jawab kya doon. Us ne poocha, mujhe ye masla batayein ke ek shakhs bahut hi khush aur hathiyar band ho kar hamare ameeron ke sath jihad ke liye jata hai. Phir wo ameer humein aaisi cheezon ka mukallaf qarar dete hain ke hum in ki taqat nahi rakhte. Mein ne kaha, Allah ki qasam! Meri kuch samajh mein nahi aata ke tumhari baat ka jawab kya doon, albatta jab hum Rasul Allah (Sallallahu Alaihi Wasallam) ke sath (aap Sallallahu Alaihi Wasallam ki hayat mubarak mein) thay to aap (Sallallahu Alaihi Wasallam) ko kisi bhi mamle mein sirf ek martaba hukm ki zaroorat pesh aati thi aur hum fauran hi ise baja late thay, ye yaad rakhne ki baat hai ke tum logon mein is waqt tak khair rahe gi jab tak tum Allah se darte raho ge, aur agar tumhare dil mein kisi mamle mein shubha paida ho jaye (ke kya chahiye ya nahi) to kisi aalim se is ke mutalliq pooch lo taake tashaffi ho jaye, wo dour bhi aane wala hai ke koi aisa aadmi bhi (jo sahi sahi masle bata de) tumhein nahi mile ga. Is zat ki qasam jis ke siwa koi mabood nahi! Jitni duniya baqi reh gayi hai wo wadi ke is pani ki tarah hai jis ka saaf aur accha hissa to piya ja chuka hai aur gudla hissa baqi reh gaya hai
.