Hum se Ubaid Bin Ismail ne bayan kiya, kaha hum se Abu Usama ne bayan kiya Hisham Bin Urwah se, wo apne walid se, un se Aisha (Radi Allahu Anha) ne bayan kiya ke Barira (Radi Allahu Anha) aaein aur kaha ke mein ne apne malikou se nau auqiya chandi par mukatabat ka mamla kiya hai. Har saal ek auqiya mujhe ada karna pare ga. Aap bhi meri madad karein. Is par Aisha (Radi Allahu Anha) ne kaha ke agar tumhare malik pasand karein to mein unhein (ye sari raqam) ek hi martaba de doon aur phir tumhein azad kar doon, to mein aisa kar sakti hoon. Lekin tumhari wala mere sath ho jaye gi. Barira (Radi Allahu Anha) apne malikou ke paas gayein to unhon ne is soorat se inkar kiya (wapas aa kar) unhon ne bataya ke mein ne aap ki ye soorat un ke samne rakkhi thi lekin wo ise sirf is soorat mein qabool karne ko tayyar hain ke wala un ke sath qaim rahe. Rasul Allah (Sallallahu Alaihi Wasallam) ne ye suna to Aap (Sallallahu Alaihi Wasallam) ne mujh se daryaft farmaya. Mein ne Aap (Sallallahu Alaihi Wasallam) ko mutla kiya to Aap (Sallallahu Alaihi Wasallam) ne farmaya ke tu unhein le kar azad kar de aur unhein wala ki shart lagane de. Wala to bahar-hal usi ki hoti hai jo azad kare. Aisha (Radi Allahu Anha) ne bayan kiya ke phir Rasul Allah (Sallallahu Alaihi Wasallam) ne logon ko khitab kiya. Allah ki hamd-o-sana ke baad farmaya, tum mein se kuch logon ko ye kya ho gaya hai ke (mamlat mein) aaisi shartein lagate hain jin ki koi asal (daleel, buniyaad) Kitab-ullah mein nahi hai. Pas jo bhi shart aaisi ho jis ki asal (daleel, buniyaad) Kitab-ullah mein na ho wo baatil hai. Khwah aaisi sau shartein kyun na lagali jayein. Allah ka faisla hi haq hai aur Allah ki shart hi mazboot hai kuch logon ko kya ho gaya hai ke wo kehte hain, Ae falan! azad tum karo aur wala mere sath qaim rahe gi. Wala to sirf usi ke sath qaim ho gi jo azad kare
.