Hum se Muhammad Bin Salam ne bayan kiya, kaha ke hum ko Wakee ne khabar di, unhein Sufyan Sawri ne, unhein un ke walid Saeed Bin Masrooq ne, unhein Abaya Bin Rifa'a ne aur un se un ke dada Rafi Bin Khadij (Radi Allahu Anhu) ne bayan kiya ke hum Nabi Kareem (Sallallahu Alaihi Wasallam) ke sath Tihamah ke maqam-e-Zulhulaifa mein thay (ghanimat mein) hamein bakriyan aur ont mile thay. Baaz logon ne jaldi ki aur (janwar zibah kar ke) gosht ko handiyon mein charha diya. Phir Rasul Allah (Sallallahu Alaihi Wasallam) tashreef laye. Aap (Sallallahu Alaihi Wasallam) ke hukm se gosht ki handiyon ko ulat diya gaya. Phir (Aap Sallallahu Alaihi Wasallam ne taqseem mein) das bakriyon ka ek ont ke barabar hissa rakha. Ek ont bhag khara hua. Qoum ke paas ghoron ki kami thi. Ek shaks ne ont ko teer maar kar rok liya. Rasul Allah (Sallallahu Alaihi Wasallam) ne farmaya ke in janwaron mein bhi jangi janwaron ki tarah wahshat hoti hai. Is liye jab tak in ko na pakar sako to tum in ke sath hi aisa sulook kiya karo. Abaya ne bayan kiya ke mere dada ne arz kiya, Ya Rasul Allah! hamein umeed hai ya khatra hai ke kahin kal dushman se mudbher na ho jaye aur churi hamare sath nahi hai. Kya dhaar dar lakri se hum zibah kar sakte hain? Aap (Sallallahu Alaihi Wasallam) ne farmaya, lekin zibah karne mein jaldi karo. Jo cheez khoon baha de (usi se kaat dalo) agar is par Allah ka naam liya jaye to is ko khao aur nakhun aur dant se zibah na karo. Is ki wajah mein batlata hoon dant to haddi hai aur nakhun Habshiyon ki churiyan hain
.