Hum se Abu Nuaim Fazl Bin Dukain ne bayan kiya, kaha ke hum se Zakariya ne, kaha mein ne Aamir Bin Shuba se suna, unhon ne bayan kiya ke mein ne Numan Bin Bashir (Radi Allahu Anhu) se suna ke Nabi Kareem (Sallallahu Alaihi Wasallam) ne farmaya Allah ki hudood par qaim rehne wale aur is mein ghus jane wale (yani khilaf karne wale) ki misal aise logon ki si hai jinhon ne ek kashti ke silsile mein qura dala. Jis ke natija mein baaz logon ko kashti ke upar ka hissa aur baaz ko neeche ka. Pas jo log neeche wale thay, unhein (dariya se) pani lene ke liye upar walon ke paas se guzarna parta. Unhon ne socha ke kyun na hum apne hi hissa mein ek surakh kar lein taake upar walon ko hum koi takleef na dein. Ab agar upar wale bhi neeche walon ko man mani karne dein ge to kashti wale tamam halak ho jayein ge aur agar upar wale neeche walon ka hath pakar lein to ye khud bhi bachein ge aur sari kashti bhi bach jaye gi
.