“Aur Abu Bakr, Umar aur Uthman Radhiallahu Anhum ne gosht khaaya aur naya Wuzu nahi kiya”.

Hum se Abdullah bin Yousuf ne bayan kiya, unhon ne kaha hamein Imam Malik ne Zaid bin Aslam se khabar di, woh Ata bin Yasaar se, woh Abdullah bin Abbas Radhiallahu Anhuma se naql karte hain ke Rasoolullah Sallallahu Alaihi Wasallam ne bakri ka shaana khaaya. Phir Namaz padhi aur Wuzu nahi kiya.

Hum se Yahya bin Bukair ne bayan kiya, kaha hamein Laith ne Uqail se khabar di, woh Ibn-e-Shihaab se riwayat karte hain, unhein Ja’far bin ’Amr bin Umaiyah ne apne baap ’Amr se khabar di ke unhon ne Rasoolullah Sallallahu Alaihi Wasallam ko dekha ke Aap Sallallahu Alaihi Wasallam bakri ke shaane se kaat kaat kar khaa rahe the, phir Aap Sallallahu Alaihi Wasallam Namaz ke liye bulaaye gaye to Aap Sallallahu Alaihi Wasallam ne churi daal di aur Namaz padhi, naya Wuzu nahi kiya.