Hum se Sulaiman Bin Harb ne bayan kiya, kaha ke hum se Shuba ne bayan kiya, un se Salama Bin Kuhail ne bayan kiya, unhon ne Abu Salama Bin Abdur Rahman se suna aur unhon ne Abu Hurairah (Radi Allahu Anhu) se ke ek shakhs Nabi Kareem (Sallallahu Alaihi Wasallam) se (apne qarz ka) taqaza karne aya, aur sakht guftagu karne laga. Sahaba-e-Karam (Radi Allahu Anhum) ghussa ho kar is ki taraf barhe lekin Aap (Sallallahu Alaihi Wasallam) ne farmaya ke ise chhor do. Kyunke jis ka kisi par haq ho to wo (baat) kehne ka bhi haq rakhta hai. Phir Aap (Sallallahu Alaihi Wasallam) ne farmaya ke is ke qarz wale janwar ki umar ka ek janwar ise day do. Sahaba (Radi Allahu Anhum) ne arz kiya Ya Rasul Allah! is se ziyada umar ka janwar to maujood hai. (Lekin us umar ka nahi) Aap (Sallallahu Alaihi Wasallam) ne farmaya ke ise wahi day do. Kyunke sab se accha aadmi wo hai jo doosron ka haq poori tarah ada kar day
.