Hum se Abdullah Bin Yusuf ne bayan kiya, unhon ne kaha hume Imam Malik ne khabar di, unhein Nafi ne aur unhein Abdullah Bin Umar (Radi Allahu Anhuma) ne ke Rasul Allah (Sallallahu Alaihi Wasallam) jab kisi ghazwa ya Haj-o-Umrah se wapas hote to jab bhi kisi buland jagah ka charhao hota to teen martaba «Allahu Akbar» kehte aur ye dua parhte «La ilaha illallahu wahdahu la shareeka lahu, lahul mulku, wa lahul hamdu, wa huwa ala kulli shayin qadeer, ayiboona taiboona abidoona sajidoona lirabbina hamidoona, sadaqallahu wadahu wa nasara abdahu wa hazamal ahzaba wahdahu» ”Allah ke siwa koi mabood nahi wo akela hai is ka koi shareek nahi, mulk isi ka hai aur hamd isi ke liye hai wo har cheez par qadir hai, hum wapas ho rahe hain, tauba karte hue ibadat karte hue apne Rabb ke huzoor sajda karte hue aur is ki hamd karte hue, Allah ne apna waada sacha kar dikhaya, apne bande ki madad ki aur saare lashkar ko tanha shikast de di. (Fatah Makkah ki taraf ishara hai)“
.