Hum se Ibrahim Bin Al-Munzir ne bayan kiya, kaha ke hum se Abdullah Bin Wahb ne bayan kiya, kaha ke mujhe Yunus ne Ibn Shihab se khabar di, kaha ke mujhe Ubaidullah Bin Abdullah Bin Umar (Radi Allahu Anhuma) ne apne baap se khabar di ke Rasul Allah (Sallallahu Alaihi Wasallam) ne Mina mein do rakaat parheen aur Abu Bakr aur Umar (Radi Allahu Anhuma) bhi aisa karte rahe aur Usman (Radi Allahu Anhu) bhi khilafat ke shuru ayyam mein (do) hi rakat parhte thay
.

Hum se Adam Bin Abi Iyas ne bayan kiya, kaha ke hum se Shuba ne Abu Ishaq Hamdani se bayan kiya aur un se Harisa Bin Wahb Khuzai (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne Mina mein humein do rakaat parhaein, hamara shumar is waqt sab se zyada tha aur hum itne be-dar kisi waqt mein na thay. (Is ke bawajood hum ko namaz qasr parhayi)
.

Hum se Qabisa Bin Uqbah ne bayan kiya, kaha ke hum se Sufyan Suri ne, un se Aamash ne, un se Ibrahim Nakhai ne, un se Abdul Rahman Bin Yazid ne aur un se Abdullah Bin Masood (Radi Allahu Anhu) ne bayan kiya ke mein ne Nabi Kareem (Sallallahu Alaihi Wasallam) ke sath Mina mein do rakat namaz parhi aur Abu Bakr (Radi Allahu Anhu) ke sath bhi do hi rakat parhi aur Umar (Radi Allahu Anhu) ke sath bhi do hi rakat, lekin phir un ke baad tum mein ikhtilaf ho gaya to kash in chaar rakaton ke badle mujh ko do rakaat hi naseeb hoteen jo (Allah ke haan) qabool ho jayein
.