Hum se Abu Naeem ne byaan kiya , kaha ke hum se Sufyan bin Uyaynah ne byaan kiya , un se Ishaq bin Abdullah bin Abi Talhah ne , un se Anas razi Allahu anhu ne farmaya ke Nabi Karim salla Allahu alaihi wasallam ne (meri maan) Umm Sulaym ke ghar mein namaaz parhayi . Main aur yateem mil kar Aap salla Allahu alaihi wasallam ke peeche kharay huay aur Umm Sulaym razi Allahu anha hamare peeche thi .

Hum se Abdullah bin Yusuf ne bayan kiya kaha ke humein Imam Malik ne khabar di Ishaq bin Abdullah bin Abi Talhah se, unhon ne Anas bin Malik Razi Allah Anhu se ke un ki nani Mulaikah ne Rasool Allah Sallallahu Alaihi Wasallam ko khana tayyar kar ke khane ke liye bulaya. Aap Sallallahu Alaihi Wasallam ne khane ke baad farmaya ke aao tumhe namaz padha doon. Anas Razi Allah Anhu ne kaha ke main ne apne ghar se ek boriya uthaya jo kasrat-e-istemal se kala ho gaya tha. Main ne is par pani chhidka. Phir Rasool Allah Sallallahu Alaihi Wasallam namaz ke liye (isi boriye par) khade hue aur main aur ek yateem (ke Rasool Allah Sallallahu Alaihi Wasallam ke ghulam Abu Zameerah ke ladke Zameerah) Aap ke peeche saff baandh kar khade ho gaye aur boodhi aurat (Anas ki nani Mulaikah) hamare peeche khadi huein. Phir Rasool Allah Sallallahu Alaihi Wasallam ne humein do rakat namaz padhayi aur wapas ghar tashreef le gaye.