`Hum se Musa bin Ismail ne bayan kiya, kaha hum se Abdul Wahid bin Ziyad ne bayan kiya, kaha hum se Ma'mar bin Rashid ne bayan kiya, un se Zuhri ne, un se Ubaidullah bin Abdullah ne, un se Ibn Abbas Radi Allahu Anhuma ne bayan kiya ke mein Abdur Rahman bin Auf Radi Allahu Anhu ko (Quran Majeed) parhaya karta tha. Jab wo aakhri hajj aaya jo Umar Radi Allahu Anhu ne kiya tha to Abdur Rahman ne Mina mein mujh se kaha kash tum Ameerul Momineen ko aaj dekhte jab un ke paas ek shakhs aaya aur kaha ke falan shakhs kehta hai ke agar Ameerul Momineen ka intiqal ho jaye to hum falan se bai'at kar lein ge. Yeh sun kar Umar Radi Allahu Anhu ne kaha ke mein aaj se-pehar ko khade ho kar logon ko khutba sunaoon ga aur un ko daraoon ga jo (aam musalmanon ke haq ko) gasab karna chahte hain aur khud apni raye se ameer muntakhab karne ka irada rakhte hain. Mein ne arz kiya ke aap aisa na karein kyunke mausam-e-hajj mein har tarah ke na-waqif aur mamooli log jama ho jate hain. Yeh sab kasrat se aap ki majlis mein jama ho jayein ge aur mujhe darr hai ke wo aap ki baat ka sahih matlab na samajh kar kuch aur ma'ni na kar lein aur ise munh dar munh udate phirein. Is liye abhi tawaffuq kijiye. Jab aap Madine pahunche jo Dar al-Hijrat aur Dar al-Sunna hai to wahan aap ke mukhatab Rasul Allah صلی اللہ علیہ وسلم ke sahabah, Muhajireen o Ansar khalis aise hi log milein ge wo aap ki baat ko yaad rakhein ge aur is ka matlab bhi theek bayan karein ge. Is par Ameerul Momineen ne kaha ke wallah! mein Madinah pahunch kar jo pehla khutba doon ga is mein is ka bayan karoon ga. Ibn Abbas Radi Allahu Anhuma ne bayan kiya ke phir hum Madine aaye to Umar Radi Allahu Anhu jumua ke din dopahar dhale baramad hue aur khutba sunaya. Unhon ne kaha: Allah Ta'ala ne Muhammad صلی اللہ علیہ وسلم ko saccha rasool bana kar bheja aur Aap par Quran utara, is Quran mein rajm ki ayat bhi thi.

Hum se Yahya Bin Sulaiman ne bayan kiya, unhon ne kaha ke mujh se Ibn Wahb ne bayan kiya, unhon ne kaha ke mujh se Imam Malik ne bayan kiya (doosri sanad) aur mujh ko Yunus ne khabar di ke Ibn Shihab ne kaha, mujh ko khabar di Ubaidullah Bin Abdullah Bin Utbah ne, unhein Abdullah Bin Abbas (Radi Allahu Anhuma) ne khabar di ke Umar (Radi Allahu Anhu) ne kaha, jab apne Nabi (Sallallahu Alaihi Wasallam) ko Allah Ta'ala ne wafat day di to Ansar Banu Saida ke «سقيفة» chopal mein jama hue. Mein ne Abu Bakr (Radi Allahu Anhu) se kaha ke Aap humein bhi wahin lay chaliye. Chunanche hum Ansar ke yahan Saqeefah Banu Saida mein pahunche
.