`Hum se Abdullah ne bayan kiya, unhon ne kaha hum se Juwairiya ne bayan kiya, un se Imam Malik ne bayan kiya, un se Zuhri ne bayan kiya, unhein Said bin Musayyib aur Abu Ubaida ne khabar di aur un se Abu Hurairah Radi Allahu Anhu ne bayan kiya ke Rasul Allah صلی اللہ علیہ وسلم ne farmaya ”Agar mein itne dinon qaid mein rehta jitne dinon Yusuf Alaihis Salam pade rahe aur phir mere paas qasid bulane aata to mein is ki dawat qabool kar leta.“

Hum se Ahmad Bin Salih ne bayan kiya kaha hum se Abdullah Bin Wahb ne bayan kiya kaha ke mujhe Yunus ne khabar di unhein Ibn Shihab ne unhein Abu Salama Bin Abd-ul-Rahman aur Said Bin Musayyab ne unhein Abu Hurairah (Radi Allahu Anhu) ne ke Rasul Allah (Sallallahu Alaihi Wasallam) ne farmaya "Hum Ibrahim Alaihis Salam ke muqabale mein shak karne ke zyada mustahaq hain jab ke unhon ne kaha tha ke mere Rabb! Mujhe dikha ke tu murdo ko kis tarah zinda karta hai. Allah Ta'ala ne farmaya 'kaha kya tum iman nahi laye' unhon ne arz kiya ke kyun nahi 'lekin ye sirf is liye taake mere dil ko aur zyada itminan ho jaye.' Aur Allah Loot Alaihis Salam par reham kar ke wo zabardast rukun (yaani Allah Ta'ala) ki panah lete thay aur agar mein itni muddat tak qaid-khane mein rehta jitni muddat tak Yusuf Alaihis Salam rahe thay to mein bulane wale ke baat zaroor maan leta."
.