Hum se Abdullah bin Yusuf ne bayan kiya , kaha hum ko Imam Malik ne khabar di , unhein Ibn Shihab ne , unhein Ubaidullah bin Abdullah ne aur unhein Abu Hurairah aur Zayd bin Khalid raziAllahu anhuma ne ke Rasool Allah salla Allahu alaihi wasallam se is kaneez ke mutalliq poochha gaya jo ghair shadi-shuda hu aur zina kara liya to Nabi Karim salla Allahu alaihi wasallam ne farmaya ke agar woh zina karaye to usay koray maaro , agar phir zina karaye to phir koray maaro , agar phir zina karaye to phir koray maaro aur usay beich daalo khwah ek rasi hi qeemat mein mile . Ibn Shihab ne bayan kiya ke mujhe yaqeen nahi ke teesri martaba (koray lagane ke hukm) ke baad yeh farmaya ya chauthi martaba ke baad .

Hum se Abdullah Bin Yusuf ne bayan kiya, kaha ke hum se Liath ne bayan kiya, kaha ke mujhe Saeed Maqbari ne khabar di, un se un ke baap ne, aur unhon ne Abu Hurairah (Radi Allahu Anhu) ko ye kehte suna ke Nabi Kareem (Sallallahu Alaihi Wasallam) ne farmaya jab koi bandi zina kare aur is ke zina ka saboot (sharaee) mil jaye to usay kore lagwaye, phir is ki lanat malamat na kare. Is ke baad agar phir wo zina kare to phir kore lagwaye magar phir lanat malamat na kare. Phir agar teesri martaba bhi zina kare to usay bech de chahe baal ki ek rasi ke badla hi mein kyun na ho
.

Hum se Ismail ne bayan kiya, kaha ke mujh se Imam Malik (Rahimahullah) ne bayan kiya, un se Ibn Shihab ne, un se Ubaidullah Bin Abdullah ne aur un se Abu Hurairah (Radi Allahu Anhu) aur Zaid Bin Khalid (Radi Allahu Anhu) ne ke Rasul Allah (Sallallahu Alaihi Wasallam) se poocha gaya ke agar koi ghair-shadi shuda bandi zina kare (to is ka kya hukm hai) Aap (Sallallahu Alaihi Wasallam) ne farmaya ke usay kore lagao. Agar phir zina kare to phir kore lagao. Phir bhi agar zina kare to usay bech do, agarchay ek rasi hi ke badle mein wo farokht ho. Ibn Shihab ne kaha ke mujhe ye maloom nahi ke (bechne ke liye) Aap (Sallallahu Alaihi Wasallam) ne teesri martaba farmaya tha ya chauthi martaba
.